ខេត្តស្ទឹងត្រែង‌៖ កម្លាំងសមត្ថកិច្ចកងរាជអាវុធហត្ថខេត្តស្ទឹងត្រែងបានចុះប្រតិបត្តិការបង្ក្រាបឃាត់ខ្លួនជនជាតិ‌ឡាវជាមួយនិងថ្នាំញៀនប្រភេទម៉ាទឹកកកICE ទម្ងន់១៩៩៧គីឡូក្រាម និងរឹបអូសយកម៉ូតូVAVEអាល់ហ្វា ពណ៌ស្លែ ពាក់ស្លាកលេខឡាវ កាលពីវេលាម៉ោង៩ និង២០ព្រឹកថ្ងៃទី១៩ ខែឧសភា ឆ្នាំ២០១៦ នៅចំណុចត្រពាំងគ្រៀលព្រំប្រទល់កម្ពុជា-ឡាវ ស្ថិតក្នុងភូមិកំផាន់ សង្កាត់សាមគ្គី ក្រុង-ខេត្តស្ទឹងត្រែង។

បើតាមការបញ្ជាក់ពីលោក ឌួង វិចិត្រ មេបញ្ជាការរងកងរាជអាវុធហត្ថ‌ខេត្តបានឲ្យដឹងថា ជនសង្ស័យខាងលើឈ្មោះម៉ូ ខាំម៉ៃសៃញ៉ាវង្ស ភេទប្រុស អាយុ៤៥ឆ្នាំ មានស្រុកកំណើតរស់នៅឃុំឃីណាក ស្រុកមើងឃូង ខេត្តចំប៉ាសាក់។ លោកបន្តថា កាលឃាត់ខ្លួននេះក្នុងបទល្មើសជាក់ស្តែងកំពុងធ្វើសកម្មភាពរងចាំការដោះដូរគ្រឿងញៀន ខណនោះ‌សមត្ថកិច្ចក៏បានទទួលការចង្អុលបង្ហាញ‌ពីក្រុមការងារទើបឈានដល់ឃាត់ខ្លួនជនសង្ស័យ ដើម្បីយកទៅធ្វើការសាកសួរបន្តតាមនីតិវិធី។

នៅចំពោះមុខសមត្ថកិច្ចជនសង្ស័យសារភាពថា ខ្លួនគ្រាន់តែជាអ្នកស៊ីឈ្នួលយកគ្រឿងញៀននេះពីឡាវមកកម្ពុជាក្នុងតម្លៃ៥០០ដុល្លារប៉ុណ្ណោះ។

លោក ឌួង វិចិត្រ បានបន្តថា ជនសង្ស័យនិងគ្រឿងញៀន ម៉ូតូជាមធ្យោបាយដឹកជញ្ជូនបទល្មើសត្រូវបានរៀបចំកសាងសំណុំរឿងបញ្ជូនទៅសាលាដំបូង៕

ដោយ៖ មាស សុផាត