ខេត្តកណ្តាល៖ មនុស្ស៣នាក់បានស្លាប់ និងរងរបួសធ្ងន់ ស្រាល បន្ទាប់ពីហេតុការណ៍គ្រោះថ្នាក់ចរាចរណ៍កើតឡើងដោយសារបើកបរម៉ូតូមិនប្រកាន់ស្តាំ និងមិនបើកភ្លើងបំភ្លឺផ្លូវ ជ្រុលទៅពុកម៉ូតូសណ្តោងរ៉ឺម៉ក យ៉ាងពេញទំហឹងកាលពីវេលាម៉ោង៨និង៥នាទីយប់ ថ្ងៃទី២០ ខែឧសភា ឆ្នាំ២០១៥ ស្ថិតចំណុចផ្លូវលេខ21 ភូមិស្វាយតានី ឃុំព្រែកគយ ស្រុកស្អាង ខេត្តកណ្ដាល ។
របាយការណ៍សមត្ថកិច្ចបញ្ជាក់ថា ម៉ូតូម៉ាកសង់កូរ៉េ ប្លឺស សេ 100 ពណ៍ក្រហម គ្មានផ្លាកលេខ បើកបរដោយឈ្មោះ ចន្ធី សុខណា (បានស្លាប់នៅកន្លែងកើតហេតុ) ភេទប្រុស អាយុ28ឆ្នាំ (មិនពាក់មួក) មុខរបរ បើកបររថយន្ត មានទីលំនៅភូមិព្រែកថ្មី ឃុំទឹកវិល ស្រុកស្អាង ខេត្តកណ្ដាល បានម៉ូតូពីត្បូងមកជើង ។ លុះពេលមកដល់ចំណុចកើតហេតុខាងលើ ក៏បានបុកជាមួយម៉ូតូសណ្ដោងរ៉ឺម៉កម៉ាកសង់កូរ៉េ ប្លឺស សេ100 ពណ៍ក្រហម គ្មានផ្លាកលេខ បើកបរដោយឈ្មោះ មាន ស្រី ភេទប្រុស អាយុ34ឆ្នាំ (ពាក់មួកការពារ) មុខរបរ បើកបរម៉ូតូរ៉ឺម៉ក មានទីលំនៅភូមិព្រែកប៉ិៈ ឃុំកោះធំ(ខ) ស្រុកកោះធំ ខេត្តកណ្ដាល (របួសបាក់ឆ្អឹងកដៃ និងដាច់ម្រាមដៃខាងឆ្វេង) ។ រីឯអ្នករួមដំណើរជាមួយទៀត ឈ្មោះចាន់ រិទ្ទី ភេទប្រុស អាយុ46ឆ្នាំ មុខរបរ កសិករ មានទីលំនៅភូមិជំនីច ឃុំកំពង់រាប ស្រុកព្រៃកប្បាស់ ខេត្តតាកែវ (របួសក្បាលត្រង់ថ្ងាស់) ។
សមត្ថកិច្ចបន្តថាករណីគ្រោះថ្នាក់នេះបណ្ដាលអោយស្លាប់ និងរបួសធ្ងន់ ស្រាល មនុស្ស៣នាក់ និងខូចខាតម៉ូតូ២គ្រឿង ។
ក្រោយវាស់វែងកន្លែងកើតហេតុ សមត្ថកិច្ចបានប្រគល់សាកសព ជូនក្រុមគ្រួសារយកទៅធ្វើបុណ្យតាមប្រពៃណី រីឯអ្នករងរបួសត្រូវបានរថយន្តសាមុយបង្អែកស្អាង ដឹកយកទៅសង្គ្រោះនៅមន្ទីពេទ្យភ្នំពេញ ។ ម៉ូតូ និងម៉ូតូសណ្ដោងរ៉ឺម៉កបានយកមករក្សាទុកនៅអធិការដ្ឋាន នគរបាលស្រុកស្អាង ដើម្បីកសាងសំណុំរឿងទៅតាមនីតិវិធី ។
នគរបាលចរាចរណ៍សង្កត់ធ្ងន់ថា ករណីនេះបង្កឡើងដោយអ្នកបើកបរម៉ូតូ បើកមិនប្រកាន់ស្ដាំ ហើយមិនបើកភ្លើងមុខបំភ្លឺផ្លូវទៀត ៕
ដោយ៖ ថាច់ យ៉ាត
