គម្រោងផលិតនាវាផ្ទុកយន្ដហោះរបស់ចិននឹងធ្វើឱ្យច្របូកច្របល់គោលនយោបាយការពារជាតិរបស់ជប៉ុន ជំរុញឱ្យជប៉ុននិងចិនឈានដល់សម័យកាលនៃសង្គ្រាមត្រជាក់អូសបន្លាយ ។ ពេលកន្លងមកថ្មីៗទស្សនាវដ្ដីស្រាវជ្រាវយោធារបស់ជប៉ុនបានផ្សព្វផ្សាយនូវអត្ថបទមួយស្ដីពីគម្រោងផលិតនាវាផ្ទុកយន្ដហោះរបស់ចិននឹងធ្វើឱ្យគោលនយោបាយការពារជាតិនៅលើដែនសមុទ្រដែនអាកាសរបស់ជប៉ុនធ្លាក់ក្នុងភាពចលាចល។ នាវាផ្ទុកយន្ដហោះ Varyag បានបង្ហាញយ៉ាងច្បាស់ពីសញ្ញានៃសង្គ្រាមត្រជាក់នឹងកើតឡើងរវាងចិននិងជប៉ុន មិនខុសអ្វីពីរុស្ស៊ីនិងអាមេរិកនាពេលកន្លងមកនោះឡើយ ។
បច្ចុប្បន្ននាវាផ្ទុកយន្ដហោះ Varyag កំពុងបើកបរសាកល្បងហើយនាវានោះអាចផ្ទុកយន្ដហោះចម្បាំងរហូតដល់ ៥០គ្រឿងគ្រប់ប្រភេទ ។ ក្នុងនោះមានទាំងយន្ដហោះចម្បាំង J-15 ទៀតផង។ ក្រៅពីនេះនៅមានយន្ដហោះប្រកាសអាសន្ន ឧទ្ធម្ភាគចក្រ និងប្រព័ន្ធរ៉ាដាដែលអាចត្រួតពិនិត្យតាមដានរាល់សកម្មភាពដែលនឹងកើតឡើងក្នុងតំបន់ ។
ចិនអាចនឹងសាកល្បងយន្ដហោះហ្វឹកហាត់ JJ-9 (Jianjiao-9) នៅលើយន្ដហោះសម្រាប់បណ្ដុះបណ្ដាលអាកាសយានិកនៅលើនាវាផ្ទុកយន្ដហោះនោះ។ ក្រៅពីនេះចិនអាចស្រាវជ្រាវផលិតយន្ដហោះប្រកាសអាសន្នភ្លាមៗដោយពឹងផ្អែកទៅលើមូលដ្ឋានគ្រឹះបច្ចេកវិទ្យានៃយន្ដហោះ Y-7 ។ យន្ដហោះដឹកអ្នកដំណើរ Y-7 ដែលអាចដឹកអ្នកដំណើរបាន៥០នាក់ប្រើប្រាស់នៅលើដែនអាកាសទូលំទូលាយជាងយន្ដហោះប្រកាសអាសន្ន E-2C របស់អាមេរិក ។
ប៉ុន្មានឆ្នាំខាងមុខទៀតនាវាផ្ទុកយន្ដហោះ Varyag នឹងដាក់ឱ្យប្រើប្រាស់ជាផ្លូវការនៅក្នុងជួរទាហានជើងទឹក។ នៅពេលដែលប្រើប្រាស់នាវាផ្ទុកយន្ដហោះនោះអាចនាំយន្ដហោះទៅជាមួយនៅពេលបំពេញបេសកកម្មក្នុងនោះមានយន្ដហោះចម្បាំងប្រភេទ J-15 ពី១២ទៅ ២៤គ្រឿង, ឧទ្ធម្ភាគចក្រប្រកាសអាសន្ន ៣គ្រឿង ប្រភេទ KA-31 ឬក៏ Z-8 និងឧទ្ធម្ភាគចក្រវាយលុកទៅលើនាវាមុជទឹកប្រភេទ J-9C ទៀតផង ។
ទោះបីចិនមិនបានប្រកាសព័ត៌មានលំអិតជុំវិញសកម្មភាពខាងលើ ប៉ុន្ដែតួលេខខាងលើនេះមិនខុសប៉ុន្មានពីតួលេខពិតនោះឡើយ ។
ក្រោយពេលនាវាផ្ទុកយន្ដហោះ Varyag ដាក់ឱ្យប្រើប្រាស់ ចិននឹងចាប់ផ្ដើមផលិតនាវាចម្បាំងមួយផ្សេងទៀតដោយបច្ចេកវិទ្យាក្នុងប្រទេសផ្ទាល់ ។ នាវាផ្ទុកយន្ដហោះថ្មីដែលមានចំណុះ៥ម៉ឺនតោនអាចប្រើប្រាស់ឧបករណ៍ហោះហើរបែបលោតស្ពានឬក៏ប្រើឧបករណ៍បាញ់៕
ប្រែសម្រួល៖ សាធី
