ខេត្តរតនគិរី៖ ហេតុការណ៍គ្រោះថ្នាក់ចរាចរណ៍នេះ បានកើតឡើងនៅវេលាម៉ោង៩និង៥នាទី ព្រឹកថ្ងៃទី២៦ ខែឧសភា ឆ្នាំ២០១៦ ត្រង់ចំណុចផ្លូវកែងបឹងកំសាន្ត ស្ថិតនៅភូមិថ្មដា សង្កាត់បឹងកន្សែង ក្រុងបានលុង ខេត្តរតនគិរី ។
ប្រជាពលរដ្ឋដែលនៅកន្លែងកើតហេតុបានឲ្យដឹងថា គេឃើញគោយន្តបើកបរពីកើតទៅលិច ផ្ទុកឈើគ្រឿងផ្ទះចាស់ៗមកដល់ចំណុចកើតហេតុក៍ដាច់កាលេធ្លាក់ចូលលូទឹកតែម្តង ។
ម្ចាស់គោយន្តនោះត្រូវបានគេស្គាល់ឈ្មោះ គឹង សាយ ភេទប្រុស អាយុ៣៣ឆ្នាំ ជនជាតិឥស្លាម មុខរបរបើកបរគោយន្ត មានទីលំនៅភូមិកាចូន ឃុំកាចូន ស្រុកវ៉ីនសៃ ខេត្តរតនគិរី រងរបួសស្រាលត្រង់ក្បាលជង្គង់ ខាងស្តាំនេះ ដោយសាម្ចាស់គោយន្តបានលោតចុះទាន់ពេលវេលា ។
ចំណែកគោយន្តបានខូចខាតស្ទើរតែទាំងស្រុងផ្នែកខាងមុខ និងជញ្ជាំងខាងស្តាំ នៅពេលនោះផងដែរ ក៏គ្មានសមត្ថកិច្ចជំនាញណាមកដោះស្រាយ ឬមកវាស់វែងឡើយ អំពីករណីគ្រោះថ្នាក់ចរាចរណ៍នេះ ។ រីឯគោយន្តកំពុងតែនៅកន្លែងកើតហេតុ រង់ចាំរថយន្តស្ទួចមកស្ទួច ។
គួរបញ្ជក់ផងដែរថា សមត្ថកិច្ចពាក់ព័ន្ធមួយចំនួនហាក់បីដូចជាមិនយកចិត្តទុកដាក់អំពីករណីគ្រោះថ្នាក់ចរាចរណ៍នោះឡើយ ឬមួយគេដឹងថា គោយន្តដឹកឈើគ្រឿង នេះមិនចង់យកទៅ ណែនាំ និងផាក់ពិន័យទេ បានជាគ្រោះថ្នាក់ចរាចរណ៍ មិនឃើញសមត្ថកិច្ចពាក់ព័ន្ធណាមកអីចឹង ៕
ដោយ៖ វុទ្ធឦសាន្ត
