ភ្នំពេញ៖ បុរសម្នាក់រត់ម៉ូតូឌុបមិនសូវកាក់កប បានបែកគំនិតធ្វើចោរឆក់ ត្រូវបានប្រជាពលរដ្ឋចាប់បានស្វាគមន៍ម្នាក់មួយដៃម្នាក់មួយជើង សំណាងល្អប៉ូលិសល្បាតទៅទាន់ បើមិនដូច្នេះទេ តុលាការប្រជាជនកាត់ទោសនៅហ្នឹងកន្លែងបាត់ទៅហើយ ។
ហេតុការណ៍នេះបានកើតឡើងកាលពីវេលាម៉ោង៧ និង៣០នាទីយប់ ថ្ងៃទី ២៧ ខែឧសភា ឆ្នាំ២០១៦ តាមបណ្តោយផ្លូវព្រះមុនីវង្ស កែងផ្លូវ១៧៤ ស្ថិតក្នុងសង្កាត់បឹងរាំង ខណ្ឌដូនពេញ រាជធានីភ្នំពេញ ។
ជនសង្ស័យឈ្មោះ តាំង តារា ភេទប្រុសអាយុ ៤០ឆ្នាំ មុខរបររត់ម៉ូតូឌុប ទីលំនៅបច្ចុប្បន្ន ផ្ទះគ្មានលេខ ស្ថិតក្នុងភូមិ២ សង្កាត់ស្រះចកខណ្ឌដូនពេញ ម៉ូតូជិះធ្វើសកម្មភាពម៉ាក ហុងដាឌ្រីមសង់ ១២៥ពណ៍ខ្មៅ ឆ្នាំ២០០៨ ពាក់ស្លាកលេខ បន្ទាយមានជ័យ 1E-6171 ។
តាមសំដីសារភាពរបស់ជនសង្ស័យបានអោយដឹងថា មុនពេលកើតហេតុរូបគេចេញពីផ្ទះនៅវេលាម៉ោង៦ល្ងាច ដើម្បីរត់ម៉ូតូឌុបដូចសព្វដង ដោយជិះឆ្វែលដើររកម៉ូយមួយជុំ រហូតដល់ម៉ោង៧យប់ ពេលដែលរូបគេជិះតាមបណ្តោយផ្លូវព្រះមុន្នីវង្ស ក្នុងទឹសដៅពីត្បូងទៅជើង ក៏ប្រទះឃើញជនរងគ្រោះ៣នាក់ម្តាយ និងកូនជិះម៉ូតូកង់បីស្របទឹសគ្នា ។ ដោយឃើញឱកាសល្អ ទើបរូបគេជិះមកអ៊ែបខាងស្តាំដៃម៉ូតូកង់បី ហើយធ្វើសកម្មភាពឆក់យកខ្សែកជនរងគ្រោះ បានសំរេច តែសំណាងអាក្រក់ពេលដែលឆក់បានហើយបម្រុងជិះម៉ូតូគេច បែរជាទាក់ដៃចង្កូតជាមួយកង់បីដួលនៅហ្នឹងកន្លែង ត្រូវប្រជាពលរដ្ឋចាប់បានវាយឡើងទ្រោមខ្លន ។
បើតាមសម្តីរបស់សម្ថកិច្ចបានអោយដឹងផងដែរថា ពេលដែលកំលាំងលោកកំពុងជិះល្បាត ក៏ស្រាប់តែឃើញមនុស្សចោមរោមវាយទៅលើបុរសម្នាក់ ពេលឃើញដូចនេះ កំលាំងលោកក៏បានចូលទៅសួរនាំ ទើបដឹងថាជាចោរឆក់ ។
ក្រោយពេលកើតហេតុ សមត្ថកិច្ចបាននាំជនសង្ស័យមកសាក់សួរ នៅប៉ុស្តិ៍ និងបានកសាងសំណុំរឿងបញ្ចូនបន្តទៅអធិការដ្ឋានខណ្ឌដូនពេញ ដើម្បីចាត់ការបន្ត រីឯខ្សែកត្រូបានប្រគល់ជូនម្ចាស់គេវិញ ៕
ដោយ៖ ព្រែកជ័យ
