ក្រុមហ៊ុនផ្តល់យោបល់ផ្នែកអចលនទ្រព្យរបស់វៀតណាម Savills Viet Nam បានឱ្យដឹងថា សន្ទស្សន៍តម្លៃអចលនទ្រព្យរបស់វៀតណាមនៅក្នុងទីក្រុងសំខាន់ពីរបានកើនឡើងក្នុងត្រីមាសទី១នៃឆ្នាំនេះ បើធៀបនឹងរយៈពេលដូចគ្នាកាលពីឆ្នាំមុននោះ។
ក្រុមហ៊ុននេះបានឱ្យដឹងថា សន្ទស្សន៍តម្លៃគេហដ្ឋាននៅក្នុងទីក្រុងហូជីមិញបានកើនឡើង១ពិន្ទុ បើធៀបនឹងត្រីមាសមុន ហើយកើនឡើង ២ពិន្ទុបើធៀបនឹងឆ្នាំមុន។
មានការលក់គេហដ្ឋានប្រហែលជា ៦,៤០០កន្លែង ពោលគឺធ្លាក់ចុះ ១៨ភាគរយបើធៀបនឹងត្រីមាសមុន ប៉ុន្តែកើនឡើង ៤៩ភាគរយបើធៀបនឹងឆ្នាំមុន។
កត្តាដែលចូលរួមធ្វើឱ្យមានការកើនឡើងនេះ រួមមានការផ្លាស់ប្តូរតាមរដូវកាលនៃតំបន់ ដំណើរការនៃសំណង់មានភាពប្រសើរឡើង ប្រភេទនៃសំណង់ ហើយនិងតម្លៃសំណង់ដែលផ្តល់ដោយអ្នកអភិវឌ្ឍន៍លំនៅឋាន។
សន្ទស្សន៍តម្លៃការិយាល័យនៅទីក្រុងហូជីមិញមាន ៨៣,៦ពិន្ទុ ពោលគឺកើនឡើង ២ពិន្ទុធៀបនឹងត្រីមាសមុន ហើយកើនឡើង ៧ពិន្ទុធៀបនឹងឆ្នាំមុន។ ការកើនឡើងនេះដោយសារតែការជួលកើនឡើង ១ពិន្ទុធៀបនឹងត្រីមាសមុន និងកើនឡើង ៤ភាគរយធៀបនឹងឆ្នាំមុន។
ការកាន់កាប់ការិយាល័យថ្មីជាមធ្យម កើនឡើង ៩៦ភាគរយ អគារកម្រិត A ហើយនិងកម្រិត B នៅក្នុងតំបន់ពាណិជ្ជកម្មកណ្តាលមានដំណើរការលក់ល្អនៅក្នុងត្រីមាសនេះ ពោលគឺកើនកើនឡើង ១ពិន្ទុ បើធៀបនឹងត្រីមាសមុន ហើយ ៦ ពិន្ទុបើធៀបនឹងឆ្នាំមុន។
ក្នុងត្រីមាសទី១នៃឆ្នាំ២០១៦ ការទិញលក់ទំហំការិយាល័យមានប្រហែលជា ២៦,៤០០ម៉ែត្រការ៉េនៅទីក្រុងនេះ ពោលគឺធ្លាក់ចុះ ៥៤ភាគរយបើធៀបនឹងត្រីមាសមុន ប៉ុន្តែកើនឡើង ១៧៦ភាគរយបើធៀបនឹងឆ្នាំមុន។ ដោយសារតែមានតម្រូវការកើនឡើងនោះ តម្លៃការិយាល័យប្រភេទ A និងប្រភេទ B ត្រូវបានគេរំពឹងថានឹងកើនឡើងនៅឆ្នាំក្រោយនេះ។ ក្រុមហ៊ុន Savills ក៏បានរំពឹងផងដែរថា ការជួលនឹងកើនឡើងប្រហែលជា ៤ភាគរយផងដែរក្នុងមួយឆ្នាំសម្រាប់រយៈពេល ៣ឆ្នាំក្រោយៗនេះ។
សម្រាប់ទីក្រុងហាណូយវិញ សន្ទស្សន៍គេហដ្ឋានមាន ១០៧.៥ពិន្ទុ ពោលគឺធ្លាក់ចុះតិចជាងមួយពិន្ទុបើធៀបនឹងត្រីមាសមុន ប៉ុន្តែកើនឡើង ០.២ពិន្ទុបើធៀបនឹងឆ្នាំមុន។
បន្ទាប់ពីតម្លៃលក់កើនឡើងនៅក្នុងត្រីមាសទី២ នៃពាក់កណ្តាលឆ្នាំមុននោះ ត្រីមាសទី១ បានធ្លាក់ចុះយ៉ាងខ្លាំងដល់ ៥,៦០០នៃការលក់ ឬ១៣ភាគរយបើធៀបនឹងត្រីមាសមុន ប៉ុន្តែ បើធៀបនឹងឆ្នាំមុននោះ មិនមានការផ្លាស់ប្តូរទេ។
នៅក្នុងត្រីមាសទី១នៃឆ្នាំ២០១៦នេះ សន្ទស្សន៍តម្លៃនៃការិយាល័យនៅក្នុងទីក្រុងនេះមាន ៥៧.៨ពិន្ទុ ពោលគឺកើនឡើង ០.៧ពិន្ទុបើធៀបនឹងត្រីមាសមុន ហើយ ១.៨ភាគរយបើធៀបនឹងឆ្នាំមុន។ ការជួលការិយាល័យគ្រប់កម្រិតដែលរួមមាន A B និង C គឺជាកត្តាជំរុញឱ្យមានកំណើននៃសន្ទស្សន៍នេះ។
ក្រុមហ៊ុននេះបានព្យាករទៀតថា នៅក្នុងឆ្នាំ២០១៦នេះ ការិយាល័យនៅក្នុងតំបន់ពាណិជ្ជកម្មកណ្តាលនឹងបន្តកើនឡើង ជាមួយនឹងអត្រាប្រហែលជា ៧ភាគរយ។ ចំណែកការិយាល័យដែលមិនស្ថិតនៅក្នុងតំបន់ពាណិជ្ជកម្មកណ្តាលវិញ ការលក់ និងការកាន់កាប់ប្រហែលជាកើនឡើង ០.៧ពិន្ទុបើធៀបនឹងត្រីមាសមុន ហើយកើនឡើង ២.២ពិន្ទុបើធៀបនឹងឆ្នាំមុន៕
ដោយ៖ រ័ត្ន
