រាជធានីភ្នំពេញ ៖ កម្មការិនីរោងចក្រម្នាក់បានរត់ទៅប្តឹងនគរបាលប៉ុស្តិ៍ចោមចៅអោយជួយអន្តរាគមន៍កាលពីរសៀលថ្ងៃទី៣០ ខែឧសភា ឆ្នាំ២០១៦ ដោយសារតែចាញ់ល្បិចប្រុសស្នេហ៍របស់នាងលួមលោមនិងរស់នៅជាមួយគ្នាអស់រយះពេលជាយូខែ និងសន្យាថាចូលស្តីដណ្តឹងរៀបការជាប្តីប្រពន្ធតាមប្រពៃណីតែមិនទាន់រៀបការផងនាងមានផ្ទៃពោះ៣ខែ ហើយស្រាប់តែប្រុសព្រានអប្រិយបានរត់គេចខ្លួនបាត់ស្រមោលដោយមិនអាឡោះអាល័យ ។
ស្ត្រីរងគ្រោះបានប្រាប់សមត្ថកិច្ចឲ្យដឹងថា ប្រុសព្រានអប្រិយដែលបោកប្រាស់ខ្លួនប្រាណនាងរហូតមានផ្ទៃពោះ៣ខែឈ្មោះ ធូន រ៉ា អាយុ៣៣ឆ្នាំ មានស្រុកកំណើតនៅភូមិសំពៅ ឃុំព្រៃឈរ ស្រុកកំពង់ត្របែក ខេត្តព្រៃវែង ។
ស្ត្រីរងគ្រោះបានបន្តថា ប្រហែលជា៧ខែមុន រូបនាងនិងបុរសនោះបានជួលបន្ទប់ស្នាក់នៅជិតគ្នា ប្រុសព្រានអប្រិយរូបនោះបានតែងតែលួងលោម ផ្តោះផ្តងពាក្យសំដីនិងតាមសុំស្នេហ៍នាងរហូតនាងបាក់ចិត្ត ព្រមទាំងបានសន្យាថានឹងចូលស្តីដណ្ដឹងនាងយកធ្វើជាប្រពន្ធបន្ទាប់ពីចូលឆ្នាំខ្មែររួចទៀតផង ។ ដោយសារតែសំដីផ្អែមល្ហែម លួងលោម នាងក៏បាក់ចិត្តជឿស្លុងរហូតព្រមប្រគល់ខ្លួនប្រាណ ព្រមទាំងរស់នៅជាមួយគ្នាដូចប្តីប្រពន្ធទៀតផង តែទីបំផុតក្រោយពេលចូលឆ្នាំខ្មែរហើយ នាងក៏បានសួរនាំរឿងចូលស្តីដណ្ដឹងរៀបការ ព្រមទាំងប្រាប់ពីរឿងនាងមានផ្ទៃពោះ៣ខែទៅហើយ ស្រាប់តែប្រុសព្រានអប្រិយរូបនោះគេចខ្លួនបាត់តែម្តងដោយមិនព្រមទទួលខុសត្រូវ ។ ទើបដាច់ចិត្តរត់មកប្តឹងសមត្ថកិច្ចប៉ុស្តិ៍ចោមចៅអោយជួយអន្តរាគមន៍ ៕
សុខាសែនជ័យ
