ខេត្តឧត្តរមានជ័យ៖ ក្មេងជំទង់ម្នាក់ឈ្មោះ លឹម លាត ភេទប្រុស អាយុ១៣ឆ្នាំ បានស្លាប់ដោយសាតែក្មេងជំទង់ម្នាក់ទៀតបាញ់នឹងកាំឆ្នៃ ប្រភេទឆ្នុក ចំត្រូវគល់ភ្លៅខាងស្តាំ កាលពីម៉ោង៧យប់នាថ្ងៃទី២៥ ខែកក្កដា ឆ្នាំ២០១៥ នៅចម្ងាយ៥គីឡូម៉ែត្រខាងក្រោយភូមិថ្នល់កែង ឃុំត្រពាំងប្រាសាទ ស្រុកត្រពាំងប្រាសាទ ខេត្តឧត្តរមានជ័យ ។
តាមរបាយការណ៍នគរបាលស្រុកត្រពាំងប្រាសាទ បានអោយដឹងថា មុនពេលកើតហេតុក្មេងទាំង២បាននាំគ្នាទៅបាញ់សត្វនៅព្រៃខាងក្រោយភូមិកាលពីវេលាម៉ោង១២ថ្ងៃត្រង់ នាថ្ងៃដដែល លុះទៅដល់ព្រៃ ក៏បានបំបែកគ្នាដើរព័ទ្ធជុំវិញកម្ពោធព្រៃមួយ លុះដើរបានមួយសន្ទុះឈ្មោះ ម៉ុត ពុត ភេទប្រុស អាយុ១៤ឆ្នាំ ដែលជាអ្នកកាន់កាំភ្លើងឆ្នុក បានឃើញព្រៃរង្គើរៗ ក៏ស្រែកសួរដើម្បីកុំអោយច្រឡំ ប៉ុន្តែពេលឈ្មោះ ម៉ុត ពុត នោះស្រែកសួរជាច្រើនដងមិនឮសម្លេងឆ្លើយតបទេ ទើបរូបគេស្មាន តែសត្វ ក៏បាញ់តម្រង់ទៅគុម្ពោធព្រៃដែលរង្គើរនោះតែម្តង ។
ពេលបាញ់ត្រូវហើយ ក៏ស្រាប់តែឮសម្លេងក្មេងរងគ្រោះស្រែកដោយត្រូវគ្រាប់កាំភ្លើង ។ ឃើញដូច្នោះឈ្មោះ ម៉ុត ពុត បានស្ទុះយកក្រណាត់ទៅចងដើម្បីកុំអោយឈាមហូរ ហើយបានគ្រាហ៍ក្មេងរងគ្រោះមកភូមិវិញ រហូតដល់ម៉ោង៧យប់ ក្មេងរងគ្រោះបានស្លាប់ ឃើញដូច្នោះឈ្មោះ ម៉ុត ពុត បានរត់គេចខ្លួនបាត់ស្រមោល ៕ ប៉ែន នួន
