ភ្នំពេញ ៖ បុរសម្នាក់ និងអ្នករួមដំណេីរដោយបុរសម្នាក់ទៀត បានបេីករថយន្តម៉ាក Lexus Rx330 មួយគ្រឿងយ៉ាងលឿន ខ្វះការប្រុងប្រយ័ត្នជ្រុលទៅបុករថយន្តស៊េរីទំនេីបម៉ាក Hyundai Tucson ដែលចតស្ងៀមលេីចំណីផ្លូវចំបញ្ឆិតពីក្រោយពេញទំហឹង បណ្ដាលឲ្យរថយន្តទាំងពីរគ្រឿងរងការខូចខាតយ៉ាងដំណំ ។
ហេតុការណ៍គ្រោះថ្នាក់ចរាចរណ៍នេះបានកេីតឡេីងកាលពីវេលាម៉ោង១ និង៥០នាទីរំលងអាធ្រាត្រ ឈានចូលថ្ងៃសៅរ៍ ទី១៧ ខែធ្នូ ឆ្នាំ២០២២ នៅតាមបណ្ដោយផ្លូវព្រះសុីសុវត្តិ ក្នុងសង្កាត់ជ័យជំនះ ខណ្ឌដូនពេញ រាជធានីភ្នំពេញ ។
តាមប្រភពព័ត៌មានពីប្រជាពលរដ្ឋដែលនៅកន្លែងកេីតហេតុបានប្រាប់ឲ្យដឹងថា មុនកេីតហេតុនោះ គេឃេីញជនបរទេស២,៣នាក់ បានបេីករថយន្តមួយគ្រឿងម៉ាក Hyundai Tucson ពណ៌ស ពាក់ផ្លាកលេខ កម្ពុជា CHR.1881 មកចតអែបខឿនលេីចំណីផ្លូវ រួចចុះដេីរលេងកម្សាន្ត ។ មួយសន្ទុះក្រោយមកស្រាប់តែមានរថយន្តម៉ាក Lexus RX 330 ពណ៌ស ពាក់ផ្លាកលេខ ភ្នំពេញ 2AS-1701 បេីកបរដោយបុរសម្នាក់ និងមានបុរសម្នាក់ទៀតរួមដំណេីរជាមួយ ទិសដៅពីត្បូងទៅជេីងក្នុងល្បឿនលឿន លុះមកដល់ចំណុចកេីតហេតុក៏ជ្រុលចង្កូតបុករថយន្ត Tucson ចំបញ្ឆិតពីក្រោយខាងឆ្វេងពេញទំហឹង បណ្ដាលឱ្យរងការខូចខាតជាខ្លាំង រីឯរថយន្ត Lexus ក៏ដាច់កាឡែកង់មុខផ្នែកខាងស្ដាំខូចខាតជាខ្លាំងផងដែរ ។
ក្នុងហេតុការណ៍គ្រោះថ្នាក់ចរាចរណ៍ខាងលេីនេះមិនបណ្ដាលឱ្យមានមនុស្សរងរបួសធ្ងន់ធ្ងរ ឬបាត់បង់ជីវិតនោះទេ ។ ក្រោយមក សមត្ថកិច្ចមូលដ្ឋានបានចុះមកដល់ ដោយឃេីញភាគីទាំងសងខាងមិនដោះស្រាយគ្នាទុករថយន្តចោល ទេីបទាក់ទងសមត្ថកិច្ចជំនាញចរាចរណ៍ឱ្យមកធ្វេីការវាស់វែងយករថយន្តទាំងពីរគ្រឿងទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយគ្នានៅពេលក្រោយ ៕
ដោយ ៖ ភារ៉ា ដង្កោ
