ខេត្តកំពង់ស្ពឺ៖ តារាសម្តែងស្រីសម្តីផ្អែមកញ្ញា មាន សូនីតា បានបង្ហាញខ្លួនជាមួយនឹងថ្នាក់ដឹកនាំបុគ្គលិកនៃរោងភាពយន្ត Legend ដើម្បីសាកសួរសុខទុក្ខ និងយកអំណោយជូនដល់កុមារប្រមាណជិត ២០០នាក់នាឱកាសទិវាកុមារអន្តរជាតិលើកទី៦៧។ កម្មវិធីនេះបានធ្វើឡើងនៅក្នុងបរិវេនអង្គការមូលនិធិទ្រទ្រង់កុមារកម្ពុជា (CCAF) ស្ថិនភូមិត្រពាំងអណ្ដូង ឃុំពាំងល្វា ស្រុកឧដុង្គ ខេត្តកំពង់ស្ពឺ។
កម្មវិធីនេះបានធ្វើឡើងនាព្រឹកថ្ងៃទី០១ ខែមិថុនា ឆ្នាំ២០១៦ ដែលជាថ្ងៃទិវាសិទ្ធិកុមារអន្តរជាតិលើកទី៦៧ នេះ ក្រៅពីវត្តមានម្ចាស់រោងភាពយន្ត Legend និងប្រធានអង្គការ CCAF និងក្រុមការងារជាច្រើនហើយនោះក្នុងនោះគេបានសង្កេតឃើញវត្តមានតារាសម្ដែងដ៏ល្បីគឺកញ្ញា មាន សូនីតា ដែលជាឯកអគ្គរាជទូតសុឆន្ទៈតំណាងឲ្យរោងភាពយន្ត Legend និងតារាសម្ដែង ហង្ស ម៉ារិនី ដែលជាតារាសម្ដែងលេចធ្លោ ក្នុងសកម្មភាពមនុស្សធម៌ ជួយដល់ជនក្រីក្រ កុមារកំព្រា ក៏បានអញ្ជើញទៅចូលរួម ក្នុងពិធីនេះផងដែរ។ កម្មវិធីដែលពួកគេធ្វើពេញមួយព្រឹករួមគ្នាមានដូចជាការដាំដើមឈើ ការផ្តិតម្រាមដៃជាមួយនឹងថ្នាំពណ៌នៅលើជញ្ជាំងសាលារៀន ការលេងល្បែងកម្សាន្ត ចែក អំណោយជាសម្ភារៈ សិក្សា ចំណីអាហារ ការទទួលទានអាហាររួមគ្នា ការថតរួបរួមគ្នាជាអនុស្សាវរីយ៍ជាដើម។
តារាសម្តែង មាន សូនីតា បានបញ្ជាក់ថា នាងពិតជាសប្បាយរីករាយក្នុងការរួមគ្នាជាមួយនឹងរោងភាពយន្ត Legend ដើម្បីការងារមនុស្សធម៌ និងកិច្ចការងារសង្គមមួយចំនួនកន្លងមក។ នាងបញ្ជាក់ថា វាគឺជាការឆ្លុះបញ្ចាំងពីការជួយត្រឡប់ទៅសង្គមវិញទៅតាមលទ្ធភាពដែលនាង ថ្នាក់ដឹកនាំ និងបុគ្គលិកអាចជួយបាន។ តារាស្រីដែលល្បីឈ្មោះនឹងសកម្មភាពសង្គមរូបនេះបញ្ជាក់ដែរថា នឹងបន្តចូលរួមផ្សព្វផ្សាយជំរុញលើកទឹកចិត្តដល់កុមារបន្តទៀតពិសេសជាមួយនឹងសកម្មភាពមួយចំនួនទៀតដែលជួយដល់សង្គមជាតិ។
អ្នកស្រី គីវ ឆវ៉េត ម្ចាស់រោងភាពយន្ត Legend បានថ្លែងប្រាប់ឲ្យដឹងថា នេះគឺជាលើកទី១ ដែលសម្ភារទាំងនេះ បានមកពីសប្បុរសជននានា បានចូលរួមតាមរយៈការកៀគរស្វែងរកមូលនិធីដើម្បីជួយសង្គមជាពិសេសគឺកុមារក្រីក្រ តាមជនបទ ។ អ្នកស្រីបន្តថា ថ្វីដ្បិតតែ Legend ជារោងភាពយន្តបម្រើឲ្យវិស័យសិល្បៈភាពយន្ត ប៉ុន្តែ Legend ក៏មិនភ្លេចចំពោះការធ្វើកម្មវិធីសប្បុរសធម៌ចូលរួមក្នុងការងារជួយសង្គមជាពិសេសការសិក្សារបស់ក្មួយៗកុមារក្រីក្រ ដោយរោងភាពយន្តបានផ្សព្វផ្សាយតាមរយៈ Facebook, Line និងបណ្ដាញសង្គមផ្សេងៗទៀតដើម្បីបង្កើតជាមូលនិធិស្វែងរកសប្បុរសជនឲ្យចូលរួមបន្ថែមទៀត ហើយថ្ងៃនេះយើងទទួលបាន សម្ភារសិក្សាមួយចំនួនចែកជូនដល់ពួកគេ។ លោកស្រីបន្តថា កន្លងមករោងភាពយន្ត Legend តែងតែធ្វើសកម្មភាពបែបនេះ ហើយការជ្រើសរើសមូលដ្ឋាននេះ ដើម្បីចែកសម្ភារសិក្សា ព្រោះតែអ្នកស្រីមើលឃើញថា កុមារនៅទីនេះកំពុងតែខ្លះខាតខ្លាំងទាំងសម្ភារសិក្សានិងសាលា និងកំពុងតែដង្ហោយរកជំនួយ ទើបក្រុមការងារជ្រើសយកកន្លែងនេះតែម្ដង ហើយរោងភាពយន្ត Legend នឹងមានគម្រោងជួយជាបន្តបន្ទាប់ទៀត។ ជាមួយគ្នានេះដែររោងភាពយន្តរួមទាំងសប្បុរសជនមួយចំនួនក៏បានរួមគ្នាផ្តល់ឲ្យអង្គការផងដែរនូវសម្ភារៈសិក្សា ថវិការមួយចំនួនផងដែរ។
លោក ហ៊ីង ចាន់ណារិទ្ធ ប្រធានអង្គការ CCAF (អង្គការមូលនិធិទ្រទ្រង់កុមារកម្ពុជា) បានថ្លែងបញ្ជាក់ថា កុមារទាំង១៩២នាក់មកពីតំបន់ជុំវិញនេះខណៈដែលពួកគេទទួលបានការសិក្សាពីរដ្ឋរួមពួកគេអាចមកសិក្សាថ្នាក់ភាសាអង់គ្លេសបាននៅទីនេះ។ លោកបញ្ជាក់ថា ជាការពិតក្មេងតូចៗ ដែលកំពុងតែរៀនភាសាអង់គ្លេសនៅក្នុងសាលានេះ ពិតជាជួបការខ្វះខាតមែន ជាពិសេសគឺបន្ទប់រៀន និងគ្រូបង្រៀនផងដែរ ដោយត្រូវចែកជាពីរវេន ហើយថ្នាក់នីមួយៗ មានចំនួនសិស្សច្រើនទៀតផង ។ លោកក៏បានថ្លែងអំណរគុណយ៉ាងជ្រាលជ្រៅដល់រោងភាពយន្ត Legend និងសិល្បករសិល្បការិនីដែលបាននាំយកអំណោយជាសម្ភារសិក្សា និងរបស់ប្រើប្រាស់ផ្សេងៗទៀត មកចែកជូនដល់កុមារក្រីក្រនៅថ្ងៃនេះ ហើយពិតជាអាចសម្រួលដល់ការសិក្សារបស់ក្មួយៗបានមួយកម្រិតធំ ហើយក៏ជាកម្លាំងចិត្តថ្មីមួយទៀតដើម្បីឲ្យពួកគេបន្តក្រេបយកចំណេះដឹងនេះឲ្យអនាគតរបស់ពួកគេភ្លឺស្វាង៕
ដោយ៖ វឌ្ឍនា
