ដោយយោងទៅតាមសមាគមពាណិជ្ជកម្មគេហដ្ឋានបានឲ្យដឹងថា ឧស្សាហកម្មអចលនទ្រព្យរបស់ថៃអាចនឹងកើនឡើងពី ៥ទៅ ១០ភាគរយ ក្នុងឆ្នាំនេះ បើទោះបីជាមានបញ្ហាពីកត្តាពីខាងក្រៅ និងខាងក្នុងក៏ដោយ។
លោក AthipPeechanon ប្រធានសមាគមនេះបានមានប្រសាសន៍ថា យើងបានព្យាករណ៍ថា ទីផ្សារខុនដូនេះនឹងមានកម្រិតថេរ ឬក៏ធ្លាក់ចុះបន្តិចបន្តួចនៅក្នុងឆ្នាំនេះ ប៉ុន្តែកំណើននៃវិស័យអចលនទ្រព្យនេះអាចនឹងត្រូវជំរុញដោយកំណើនគេហដ្ឋានវិញ។
លោក Athip បានបន្ថែមទៀតថា យើងនឹងមើលឃើញគម្រោងអចលនទ្រព្យថ្មីក្នុងឆ្នាំនេះតែនៅក្នុងទីក្រុងបាងកកប៉ុណ្ណោះ ហើយគម្រោងទាំងនោះនឹងស្ថិតក្នុងដៃតែរបស់ក្រុមហ៊ុនអចលនទ្រព្យធំៗតែប៉ុណ្ណោះ។
ធនាគារជាច្រើនកំពុងតែប្រុងប្រយ័ត្នចំពោះការពង្រីកកម្ចីដល់ក្រុមហ៊ុនអចលនទ្រព្យរយៈពេលវែង និងខ្លី ដែលគ្មានគម្រោងអភិវឌ្ឍច្បាស់លាស់ផងដែរ។
ការកើនឡើងនៃគេហដ្ឋានត្រូវបានជំរុញដោយវិធានការលើកកំពស់ឧស្សាហកម្មអចលនទ្រព្យរបស់រដ្ឋាភិបាល ដែលដាក់ចេញកាលពីខែវិច្ឆិកាដល់ខែមេសា។ តែឥឡូវនេះវិធានការនេះបានផុតកំណត់ហើយ។
ប្រតិបត្តិការទិញលក់គេហដ្ឋាន អំឡុងមានវិធានការណ៍នោះ បានកើនឡើង ២៣ភាគរយដល់ចំនួន ៦៨,៥០០យ៉ូនីត។ ចំណែកប្រតិបត្តិការខុនដូវិញ បានកើនឡើងដល់ ១០៦ភាគរយដល់ចំនួន ៦៣,០០០យ៉ូនីត។
លោក Athip បានមានប្រសាសន៍ថា គម្រោងខុនដូជាច្រើនកំពុងតែប្រឈមមុខនឹងបញ្ហាផ្គត់ផ្គង់លើស ដែលមានយ៉ាងហោចណាស់ក៏មួយឆ្នាំដែរ។
ទោះបីជាយ៉ាងណាក៏ដោយ នៅតែមានតម្រូវការពិតប្រកបសម្រាប់គេហដ្ឋាននៅក្នុងខេត្តជាច្រើនផងដែរ ដោយសារតែវាជាទ្រព្យសម្បតិ្ត ដែលចាំបាច់របស់អតិថិជន។
ទោះបីជាយ៉ាងណាក៏ដោយ លោក VisutSrisuphan រដ្ឋមន្ត្រីក្រសួងសេដ្ឋកិច្ចបានមានប្រសាសន៍ថា ឆ្នាំ២០១៦នេះ នឹងក្លាយជាឆ្នាំប្រជែងមួយផ្សេងទៀតសម្រាប់ពាណិជ្ជកម្មទាំងអស់ ដែលរួមមានអចលនទ្រព្យជាដើម។
សេដ្ឋកិច្ចពិភពលោកកំពុងតែងើបឡើងបណ្តើរៗ ប៉ុន្តែទីផ្សារហិរញ្ញវត្ថុសកលនៅមិនទាន់មានស្ថិរភាពនៅឡើយទេ។
លោកបានបន្ថែមទៀតថា គ្រោះរាំងស្ងួតបានធ្វើឱ្យប៉ះពាល់ដល់វិស័យកសិកម្ម និងបំណុលផ្ទះសម្បែងនៅតែជាចំណុចរសើបដដែល ដែលនេះចាំបាច់ត្រូវមានការត្រួតពិនិត្យដោយប្រុងប្រយ័ត្ន៕
ដោយ៖ រ័ត្ន
