ភ្នំពេញ ៖ កុមារីអភ័ព្វមានវ័យ៥ឆ្នាំម្នាក់ ត្រូវបានជនល្មោភកាមមិនស្គាល់មុខចាប់បីយកទៅរំលោភសេពសន្ថវៈបានសម្រេច ហើយរត់គេចខ្លួន នៅក្នុងផ្ទះកំពុងសាងសង់មួយ ស្ថិតក្នុងភូមិព្រែកតាឡុង១ សង្កាត់ចាក់អង្រែក្រោម ខណ្ឌមានជ័យ នាម៉ោង ៧និង៣០នាទី យប់ថ្ងៃទី៩ ខែមិថុនា ឆ្នាំ២០១៦ ។
សមត្ថកិច្ចនគរបាលខណ្ឌមានជ័យបានឲ្យដឹងថា ក្មេងស្រីរងគ្រោះ មានឈ្មោះ ស-ស-គ អាយុ៥ឆ្នាំ ស្នាក់នៅក្នុងការដ្ឋានសំណង់ផ្ទះល្វែងកំពុងសាងសង់ ក្នុងភូមិព្រែកតាឡុង កន្លែងកើតហេតុខាងលើ មានឪពុកឈ្មោះសេង ស្រស់ អាយុ៥៨ឆ្នាំ មុខរបរកម្មករសំណង់ ម្តាយឈ្មោះ ឃុត មុំ អាយុ៤៣ឆ្នាំ មានស្រុកកំណើត ភូមិក្រសាំង ឃុំយៀង ស្រុកជាំក្សាន្ត ខេត្តព្រះវិហារ ។ គ្រួសារនេះមានជីវភាពក្រីក្រ បានចាកចេញពីស្រុកកំណើត មកធ្វើកម្មករសំណង់ក្និងការដ្ឋានខាងលើយូរថ្ងៃមកហើយ។
ក្រោយកើតហេតុសមត្ថកិច្ចចុះទៅដល់ត្រួតពិនិត្យកន្លែងកើតហេតុ រកឃើញវត្ថុតាង ដែលបន្សល់ទុកនៅកន្លែងកើតហេតុ រួមមាន ខោជើងខ្លីរូបតុក្កតា១ និងស្បែកជើងម្ខាង ពណ៌បៃតង ដែលជារបស់ជនសង្ស័យ រួចយកទៅរក្សាទុកដើម្បីធ្វើការស្រាវជ្រាវបន្ត ។
បច្ចុប្បន្ន នគរបាលមូលដ្ឋាន បាននិងកំពុងធ្វើការស្រាវជ្រាវវែករកមុខជនសង្ស័យ ដើម្បីយកមកផ្តន្ទាទោសតាមច្បាប់ ខណៈដែលសមត្ថកិច្ចដាក់ការសង្ស័យថាជនល្មោភកាម ជាមនុស្សនៅមិនឆ្ងាយពីការដ្ឋានសំណង់មួយនេះ៕
ដោយ៖ សីលា
