ខេត្តស្វាយរៀង៖ បុរសពីនាក់រងរបួសធ្ងន់ដោយសារករណីគ្រោះថ្នាក់ចរាចរណ៍ជិះម៉ូតូ១គ្រឿងទៅបុកនិងរថយន្តកុងតឺន័រពីក្រោយយ៉ាងពេញទំហឹងកាលពីវេលាម៉ោង៨និង៣នាទីយប់ថ្ងៃទី១៣ ខែមុថុនា ឆ្នាំ២០១៦ លើកំណាត់ផ្លូវជាតិលេខ១ ស្ថិតនៅភូមិស្វាយ សង្កាត់ចេក ក្រុងស្វាយរៀង។

សមត្ថកិច្ចនគរបាលក្រុងស្វាយរៀងបានឲ្យដឹងថា បុរសរងគ្រោះមានឈ្មោះ ចឹក ចន្ថា  អាយុ៤២ឆ្នាំ មុខរបរកម្មករ និងអ្នករួមដំណើរឈ្មោះ សំ ចំរើន អាយុ៣៥ឆ្នាំ មុខរបរកម្មករ ដោយអ្នកទាំង២មានទីលំនៅភូមិព្នៅ ឃុំតាសួស  ស្រុកស្វាយជ្រំ។

តាមសាក្សីដែលឃើញហេតុការណ៍ខាងលើនេះបានឲ្យដឹងថា នៅមុនពេលកើតហេតុមានបុរសពីនាក់បានជិះម៉ូតូ១គ្រឿងម៉ាកហុងដាសេ១២៥ ពណ៌ខ្មៅ ពាក់ស្លាកលេខ ស្វាយរៀង 1G-7165 លើកំណាត់ផ្លូវជាតិលេខ១ ពីកើតមកលិចខណៈយប់ងងឹតក៏បុកនិងរថយន្តកុងតឺន័រ១គ្រឿងពាក់ស្លាកលេខ ភ្នំពេញ 3C-3635 ដែលឈប់ពីមុខយ៉ាងពេញទំហឹងលាន់សូរក្ដាំងដោយត្រូវបានអ្នកភូមិចេញមកចោមរោមមើលនិងហៅរថយន្តសាមុយដឹកមកកាន់មន្ទីពេទ្យបង្អែកខេត្តស្វាយរៀង។

ចំពោះរថយន្តនិងម៉ូតូត្រូវបានសមត្ថកិច្ចនគរបាលធ្វើការវាស់វែងនិងអូសមកកាន់ការិយាល័យនគរបាលចរាចរណ៍ខេត្តដោះស្រាយតាមនីតិវិធី៕

ដោយ៖ យឹមសុថាន