ខេត្តស្វាយរៀង៖ ស្ត្រីម្នាក់បានស្លាប់ភ្លាមៗនៅនិងកន្លែងខណៈជិះម៉ូតូបើកជែងរថយន្តមិនផុតក៏បះដៃចង្កូតដួលចូលខាងក្រោមកង់រថយន្តដែលបើកបញ្រាស់ទិសគ្នាកាលពីវេលាម៉ោង៩និង១០នាទីព្រឹកថ្ងៃទី១៦ ខែមិថុនាឆ្នាំ២០១៦ នៅលើកំណាត់ផ្លូវជាតិលេខ១ ស្ថិតនៅក្នុងភូមិបាវិតកណ្ដាល សង្កាត់បាវិត ក្រុងបាវិត ខេត្តស្វាយរៀង។
តាមសមត្ថកិច្ចនគរបាលខេត្តស្វាយរៀងបានឲ្យដឹងថា មុនកើតហេតុមានរថយន្តកុងតឺន័រ១គ្រឿង ម៉ាក HOWO A7 ពណ៌ទឹកមាស ផ្លាកលេខ 29C-49604 បើកបរដោយឈ្មោះ ដង ស៊ឹងហាយ ភេទប្រុស អាយុ៣០ឆ្នាំ ជនជាតិវៀតណាម មានទីលំនៅ ភូមិថូវិនបាក់ ឃុំវាំងហាយ ស្រុកវាំងចិច ខេត្តវាំងប៊ិន បើកបរពីកើតទៅលិច លុះមកដល់ចំណុចកើតហេតុខាងលើក៏មានម៉ូតូ១គ្រឿងម៉ាក YAMAHA Attila ពណ៌ក្រហម ផ្លាកលេខ 70-D1-02472 បើកបរដោយឈ្មោះ លៀង សុខលី ភេទស្រី អាយុ២៥ឆ្នាំ ជនជាតិខ្មែរ មានទីលំនៅភូមិបាវិតកណ្ដាល សង្កាត់បាវិត ក្រុងបាវិត ខេត្តស្វាយរៀង បើកបរពីលិចទៅកើត បានបើកជែងរថយន្តតែមិនផុតក៏ដួលបោកក្បាលចូលកង់រថយន្តខាងក្រោយបណ្តាលឲ្យស្លាប់ភ្លាមៗនៅនិងកន្លែងកើតហេតុ។
បច្ចុប្បន្នសពស្ត្រីរងគ្រោះត្រូវបានសមត្ថកិច្ចប្រគល់ជូនក្រុមគ្រួសារយកទៅធ្វើបុណ្យតាមប្រពៃណី ចំពោះអ្នកបើកបររថយន្តត្រូវបានឃាត់ខ្លួនទុកនៅប៉ុស្ដិ៍សង្កាត់បាវិត រីឯមធ្យោបាយទាំង២គ្រឿងត្រូវសមត្ថកិច្ចយើងយកមករក្សាទុក នៅគោលដៅខាងកើតមុខកូវ៉ា ដើម្បីបំពេញសំណុំរឿងបញ្ជូនទៅការិយាល័យជំនាញខេត្តចាត់ការតាមនីតិវិធី៕
ដោយ៖ យឹមសុថាន
...
