ខេត្ដឧត្ដរមានជ័យ ៖ តាមប្រភព ព័ត៌មានពីកម្លាំងសមត្ថកិច្ចចម្រុះស្រុក ត្រញំប្រាសាទដែលបានចុះសហការចាប់ រថយន្ដដឹកឈើក្រញូងជាមួយមន្ដ្រីរដ្ឋ បាលព្រៃឈើស្រុកត្រញំងប្រាសាទកាលពីប៉ុន្មានថ្ងៃកន្លងទៅនេះបង្ហើបឱ្យដឹងថា ឈើក្រញូងជាងពាក់កណ្ដាលនៅក្នុងរថយន្ដដែលបានចាប់នោះមានការបាត់បង់ ជាងពាក់កណ្ដាលដោយគេសង្ស័យមន្ដ្រី រដ្ឋបាលព្រៃឈើស្រុកត្រញំងប្រាសាទ លួចស៊ីដាច់ ។
ប្រភពពីមន្ដ្រីសមត្ថកិច្ចបានឱ្យដឹង ទៀតថា ឈើក្រញូងដែលបានចាប់នោះ មានចំនួន៦៥ដុំ ទម្ងន់១.១៤៨គីឡូក្រាម តែមកដល់ពេលនេះត្រូវបានគេដឹងថា ចំនួនឈើក្រញូងខាងលើនេះនៅសល់តែ ៣១ដុំ ស្មើនឹង៦២៥គីឡូក្រាមប៉ុណ្ណោះ។ ដូច្នេះបានបាត់បង់អស់ចំនួន៣៤ដុំស្មើ និង៦២៥គីឡូក្រាម ។
ទាក់ទិននិងព័ត៌មាននេះលោក សុង បញ្ញា មន្ដ្រីរដ្ឋបាលព្រៃឈើស្រុកត្រញំង ប្រាសាទបានច្រានចោលចំពោះព័ត៌មានដែលបានលើកឡើងនេះ ព្រោះថាតួលេខ ចំនួនឈើមាន២រថយន្ដក៏ថាបាន ពីព្រោះ នៅថ្ងៃចាប់រថយន្ដដឹកឈើក្រញូងនេះ កម្លាំងសមត្ថកិច្ចចម្រុះក៏នៅជួបជុំគ្នា ទាំងអស់និងពិនិត្យឃើញឈើក្រញូងតែ ៣១ដុំស្មើនឹង៦២៥គីឡូ ដូច្នេះពុំមានការ បាត់បង់អ្វីនោះទេ ។
ដោយឡែកលោក ញ៉ែម ណាយវ៉ាន់ នាយសង្កាត់រដ្ឋបាលព្រៃឈើស្រុកត្រញំង ប្រាសាទមិនអាចរកការពន្យល់បានទេ ខណៈទូរស័ព្ទចូលពុំមានអ្នកលើក ។
គួររំលឹកថា កាលពីវេលាម៉ោង៥ ទៀបភ្លឺថ្ងៃទី២៦ ខែកក្កដា ឆ្នាំ២០១៥ នៅ ចំណុចភូមិព្រះចំបក់ ឃុំអូរស្វាយ ស្រុក ត្រញំងប្រាសាទ ខេត្ដឧត្ដរមានជ័យ កម្លាំង សមត្ថកិច្ចចម្រុះស្រុកបានសហការជា មួយមន្ដ្រីជំនាញរដ្ឋបាលព្រៃឈើស្រុក ត្រញំងប្រាសាទចាប់រថយន្ដឆ្លាមមួយ គ្រឿងដែលបានផ្ទុកឈើក្រញូងពេញក្នុង រថយន្ដ។ រថយន្ដដែលកម្លាំងសមត្ថកិច្ច បង្ក្រាបបានម៉ាកកាមរី ពណ៌ត្រីឆ្លូញ ពាក់ស្លាកលេខភ្នំពេញ 2C-5129 ហើយ បានឃាត់ខ្លួនអ្នកបើកបរម្នាក់ឈ្មោះ វ៉ាន់ សម្បត្ដិ ភេទប្រុស អាយុ២៩ឆ្នាំ រស់ នៅភូមិឃ្លាំងកណ្ដាល ឃុំត្រញំងប្រិយ៍ ស្រុកអន្លង់វែង ហើយគេបានដឹងថា ម្ចាស់កម្មសិទ្ធរថយន្ដឈ្មោះ អ៊ុង រស់ រស់នៅភូមិអូរចិញ្ចៀន ឃុំ-ស្រុកអន្លង វែង ។ ចំណែកឈើដែលសមត្ថកិច្ច បង្ក្រាបបាននៅក្នុងរថយន្ដគឺឈ្មួញទិញពី ឈ្មោះ ខុម ជឿន រស់នៅភូមិ-ឃុំអូរ ស្វាយ ស្រុកត្រញំងប្រាសាទ ។
នៅថ្ងៃឃាត់រថយន្ដដឹកបទល្មើសឈើ ប្រណិតនេះសមត្ថកិច្ចពិសេសរដ្ឋបាល ព្រៃឈើស្រុកត្រញំងប្រាសាទហាក់លាក់ លៀមតួលេខចំនួនឈើដល់អ្នកយកព័ត៌មាន ។ តែយ៉ាងណាពេលនេះបែកមេ ក្រម៉ីពីកម្លាំងសមត្ថកិច្ចចម្រុះស្រុក ត្រញំងប្រាសាទថា ក្រុមមន្ដ្រីរដ្ឋបាល ព្រៃឈើស្រុកត្រញំងប្រាសាទលួចឈើ ដែលចាប់បានជាងពាក់កណ្ដាលដោយ គេសង្ស័យយកទៅលក់ចែកលុយគ្នា ចាយលេង ៕ ប៉ែន នួន
