ភ្នំពេញ៖ មុននេះបន្ដិច មានករណីស្ត្រីម្នាក់ត្រូវជនមិនស្គាល់មុខយកកាំបិតចុងស្រួចចាក់ពីក្រោយមួយកាំបិតបណ្តាលឲ្យស្លាប់ភ្លាមៗនៅកន្លែងតែម្តង។
ហេតុការណ៍នេះបានកើតឡើងនៅវេលាម៉ោង១០ និង១០នាទីព្រឹកថ្ងៃទី២១ ខែមិថុនា ឆ្នាំ២០១៦ ស្ថិតនៅផ្លូវលេខ២១៩ កែង១៦៥ ក្នុងសង្កាត់ផ្សារដេប៉ូ១ ខណ្ឌទួលគោក។
ជនរងគ្រោះមានឈ្មោះ លី ដាវី អាយុ៣៦ឆ្នាំ ស្នាក់នៅក្រុម១២ សង្កាត់ផ្សារដេប៉ូ១ ខណ្ឌទួលគោក មានស្រុកកំណើតនៅ ឃុំកំពង់ស្វាយ ខេត្តកំពង់ធំ។
ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញស្ត្រីម្នាក់មានវ័យជាង៣០ឆ្នាំ បានដើរលើដងផ្លូវលេខ២១៩ តែម្នាក់ឯង។ មួយសន្ទុះក្រោយមកស្រាប់តែមានបុរសមាឌធំអាយុប្រហែលជាង៤០ឆ្នាំ ជិះម៉ូតូមួយគ្រឿងមកដល់ក៏ដកកាំបិតមុខស្រួចចាក់ទៅលើស្ត្រីរងគ្រោះពីក្រោយបណ្តាលឲ្យដួលស្លាប់មួយរំពេច ហើយជនសង្ស័យក៏ជិះម៉ូតូគេចខ្លួនបាត់ទៅ។
នៅកន្លែងកើតហេតុសមត្ថកិច្ចសង្ស័យថា ករណីនេះជាករណីគំនុំ ដែលមកដល់ពេលនេះកំពុងស្រាវជ្រាវរកមុខជនសង្ស័យចាប់មកផ្តន្ទាទោសតាមច្បាប់ឲ្យបាន៕
ដោយ៖ ស ដារ៉ា
