ខេត្តមណ្ឌលគិរី៖ នាព្រឹកថ្ងៃទី០៤ មិថុនា ២០២៣ កងទ័ពមួកខៀវកម្ពុជា និងអាជ្ញាធរមីន រួមសហការជាមួយអាជ្ញាធរខេត្តមណ្ឌលគិរី បានរៀបចំពិធីចុះសួរសុខទុក្ខ សំណេះសំណាល ប្រជាពលរដ្ឋ កងកម្លាំង និងកម្ទេចគ្រាប់មិនទាន់ផ្ទុះ នៅឃុំរយ៉ ស្រុកកោះញែក ខេត្តមណ្ឌលគិរី។
ឯកឧត្តម សែម សុវណ្ណនី ទេសរដ្ឋមន្រ្តី អនុប្រធានទី២ អាជ្ញាធរមីន បានថ្លែងថា កម្ពុជាធ្លាប់ជាប្រទេសមួយដែលរងគ្រោះជោគជាំដោយភ្លើងសង្រ្គាមអស់ ជាច្រើនទសវត្សរ៍។ បន្ទាប់ពីសង្រ្គាមត្រូវបញ្ចប់ គ្រាប់មីន និងយុទ្ធភ័ណ្ឌមិនទាន់ផ្ទះជាច្រើនបាននៅសេសសល់កប់ក្នុងដីដែលតែងបង្ក ជាហានិភ័យដល់អាយុជីវិតមនុស្សសត្វនិងទ្រព្យសម្បត្តិទូទាំងប្រទេស។
ឯកឧត្តម បន្តថា មជ្ឈមណ្ឌលជាតិរក្សាសន្តិភាព គឺបានធ្វើការ បោសសំអាតមីន និងបានប្រកាសភូមិ ឃុំ និងខេត្តមួយចំនួនអស់មីន រួមមាន៖១. ខេត្តព្រៃវែង កាលពីខែឧសភា ឆ្នាំ២០២២ បានបោសសំអាត និងប្រកាសជាខេត្តអស់មីន។ ២. ខេត្តត្បូងឃ្មុំ បានបោសសំអាត និងប្រកាសជាខេត្តអស់មីន កាលពីខែធ្នូ, ឆ្នាំ២០២២
។ ៣. ខេត្តកំពង់ស្ពឺ បានបោសសំអាត និងប្រកាសឃុំចំនួន ០១ និងភូមិចំនួន ០៣ ស្ថិតក្នុងស្រុកគងពិសី ជាភូមិ ឃុំអស់មីន នាខែមករា ឆ្នាំ២០២៣។ ៤. ខេត្តកោះកុង បានបោសសំអាត និងប្រកាសឃុំកោះស្តេច ជាឃុំអស់មីន កាលពីខែមីនា ឆ្នាំ២០២៣។៥.ខេត្តក្រចេះ និងប្រកាសជាខេត្តអស់មីនក្នុងពេលឆាប់ៗនេះ។
ដោយមានការសហការយ៉ាងស្អិតរមួតជាមួយអាជ្ញាធរមីនកម្ម្ពុជា ជាមួយអាជ្ញាធរដែនដីគ្រប់លំដាប់ថ្នាក់និងក្រោមការគាំទ្រពីមូលនិធិកម្ពុជាគ្មានមីនឆ្នាំ២០២៥ ក្នុងការអនុវត្តគម្រោងសម្ដេចតេជោសម្រាប់សកម្មភាពមីនក្រោមមូលបទ ផ្តល់ដីមានសុវត្ថិភាពបង្កើតស្នាមញញឹម ជាហេតុនាំឱ្យប្រតិបត្តិការទទួលបានជោគជ័យយ៉ាងត្រចះត្រចង់។
ឯកឧត្តម សែម សុវណ្ណនី បញ្ជាក់ថា ប្រតិបត្តិការក្នុងខេត្តមណ្ឌលគិរីនេះ ក្នុងការអនុវត្តន៍គម្រោង «ផ្តល់ដីមានសុវត្ថិភាពមានផ្ទៃដីសរុបចំនួន៩,១២១,៩៧៣ ម៉ែត្រក្រឡា ត្រូវបានបោសសំអាតបានផ្ទៃដីសរុប៨,១៧៩,៣៧៧ ម៉ែត្រក្រឡា ស្មើនឹងប្រមាណ ៨០% នៃផ្ទៃដីសរុប។ ក្នុងនោះ មន្ត្រីបានរកឃើញមីនប្រឆាំងមនុស្ស និងរថក្រោះចំនួន ៤៤គ្រាប់ យុទ្ធភណ្ឌមិនទាន់ផ្ទះចំនួន ១៦៩គ្រាប់ ព្រមទាំងអំបែងចំនួន ៥៦,៩៤៩ដុំ។ ចំពោះផ្ទៃដីដែលបានបោសសំអាតរួចបានបែងចែកទៅប្រជាពលរដ្ឋចំនួន៦១៤គ្រួសារ។
លោក នួន សារ៉ន អភិបាលរងខេត្តមណ្ឌលគិរី បានឲ្យដឹងថា ខេត្តមណ្ឌលគិរី អាចនិយាយបានថា ជាខេត្តមួយដែលមិនសូវទទួលរងនូវការគម្រាម កំហែងពីគ្រាប់មីន និងយុទ្ធភ័ណ្ឌមិនទាន់ផ្ទុះផ្សេងៗ ដែលកន្លងមក មានការរងផលប៉ះពាល់តិចតួច ពីគ្រាប់បែកចង្កោមតែប៉ុណ្ណោះ ដែលធ្វើឱ្យមានសុខសុវត្ថិភាពជូនដល់ប្រជាពលរដ្ឋ។
តាមរបាយការណ៍របស់ឧត្តមសេនីយ៍ទោ សែម រតនា អគ្គនាយករងមជ្ឈមណ្ឌលជាតិ និងជាប្រធានការដ្ឋានបោសសំអាតមីន បានបញ្ជាក់ថា: យោងតាមផែនការយុទ្ធសាស្ត្ររបស់រាជរដ្ឋាភិបាល ក៏ដូចជាអាជ្ញាធរមីន ដែលបានកំណត់ថាកម្ពុជានឹងអស់មីននៅឆ្នាំ២០២៥ រួមទាំងការយកចិត្តទុកដាក់ខ្ពស់ពីសំណាក់ រាជរដ្ឋាភិបាលកម្ពុជា ដែលមាន សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងជាប្រធានអាជ្ញាធរមីន បានជំរុញខ្លាំងលើការងារបោសសំអាតមីន ដែលបានបង្កើតជាមូលនិធិសម្រាប់បោសសម្អាតមីន ដើម្បីរក្សាសុវត្ថិភាពជូនប្រជាពលរដ្ឋ តាមរយៈ ការដាក់ចេញនូវផែនការសកម្មភាពការងារនេះ កងកម្លាំង នៃមជ្ឈមណ្ឌលជាតិ រក្សាសន្តិភាព បោស សម្អាតមីន និងសំណល់ជាតិផ្ទុះពីសង្គ្រាម បានចុះអនុវត្តការងារនៅតាមបណ្តារាជធានី ខេត្ត ទាំង២៥ ទូទាំងប្រទេស ក្នុងនោះក៏មានខេត្តមណ្ឌលគិរី ផងដែរ ៕
