ទីក្រុងលីវចូវ៖ លោក ហ៊ង ចៀន ភីង (Huang Jian Ping) អគ្គនាយករងក្រុមហ៊ុន ជីង សាងជឺ ដែលជាក្រុមហ៊ុនផលិតថ្នាំ និងអាហារបំប៉នសុខភាពធំមួយនៅក្នុងប្រទេសចិន កំពុងតែសំឡឹងរកឱកាសពង្រីកការចែកចាយផលិតផលឱសថ ស្ករបៀមសម្រួលបំពង់ក និងប្រភេទថ្នាំបំប៉នសុខភាពផ្សេងទៀតរបស់ខ្លួន នៅក្នុងប្រទេសកម្ពុជា។
លោក ហ៊ង ចៀន ភីង បានថ្លែងទៅកាន់ក្រុមអ្នកសារព័ត៌មានកម្ពុជា កាលពីថ្ងៃទី១៧ ខែមិថុនាថ្មីៗនេះ ក្នុងការធ្វេីទស្សនកិច្ចទៅកាន់ក្រុមហ៊ុនមួនេះ ដែលមានទីតាំងនៅក្រុងលីវចូវ ខេត្តក្វាងស៊ី យ៉ាងដូច្នេះថា៖ ក្រុមហ៊ុន ជីងសាងជឺ បង្កើតតាំងពីឆ្នាំ១៩៤៣ ជាក្រុមហ៊ុនផលិតស្ករគ្រាប់ ហើយបច្ចុប្បន្នបានវិវត្តខ្លួនជាក្រុមហ៊ុនផលិតថ្នាំដែលឈរនៅលំដាប់លេខ ៥០ នៅក្នុងប្រទេសចិន។ ក្រុមហ៊ុននេះផ្តោតលើ ការផលិតថ្នាំ ស្កបៀម និងអាហារបំប៉នសុខភាព ហើយបច្ចុប្បន្នក្រុមហ៊ុនមានផលិតឱសថ ស្ករបៀម និងអាហារបំប៉នសុខភាព ចំនួន ៣៦៨ប្រភេទ។ ផលិតផលរបស់ក្រុមហ៊ុន កំពុងត្រូវបានចែកចាយទាំងក្នុងប្រទេស និងទៅប្រទេសចំនួន ៥៣ទៀតនៅទូទាំងពិភពលោក ក្នុងនោះមាន សហរដ្ឋអាម៉េរិក តំបន់អឺរ៉ុប រុស្ស៊ី ជប៉ុន សិង្ហបុរី ថៃ និងក្នុងប្រទេសកម្ពុជាផងដែរ។
លោកអគ្គនាយករងរូបនេះ បន្តថា ទីផ្សារកម្ពុជាគឺជាទីផ្សារសំខាន់មួយក្នុងតំបន់អាស៊ាន។ ដូច្នេះក្រុមហ៊ុន បាន និងជំរុញឱ្យផលិតផលរបស់ក្រុមហ៊ុន ត្រូវបានចែកចាយលក់នៅទូទាំងប្រទេសកម្ពុជា។ លោក ហ៊ង ចៀន ភីង បន្ថែមទៀតថា៖ «ដោយសារតែផលិតផលមានលក់នៅច្រើនប្រទេស ដូច្នេះក្រុមហ៊ុន នឹងបន្តកែច្នៃប្រភេទថ្នាំ និងអាហារសុខភាព តាមតម្រូវការរបស់ប្រជាជនតាមប្រទេសនីមួយៗ ដោយឈរលើស្មារតីយកចិត្តទុកដាក់លើសុខភាពប្រជាជនជាធំ»។
លោក ហ៊ង ចៀន ភីង បានបន្ថែមទៀតថា៖ «ក្រុមហ៊ុន គឺអនុវត្តតឹងរឹងបំផុតនូវស្តង់ដារគ្រប់គ្រងរបស់ប្រទេសចិន។ ក្រុមហ៊ុនមានឆន្ទៈខ្ពស់ ក្នុងការអនុវត្ត ឱ្យក្រុមហ៊ុនមានកេរ្តិ៍១០០ឆ្នាំ ដោយសារក្រុមហ៊ុន គឺពាក់ព័ន្ធនឹងសុខភាពប្រជាជន ដូច្នេះនៅពេលដែលផលិតផលិតផលនីមួយៗ គឺចាត់ទុកដូចជាការថែរក្សាសុខភាពខ្លួនផ្ទាល់»។
សូមជម្រាបជូនថា ក្រៅពីប្តេជ្ញាចិត្តជំរុញវត្តមានផលិតផលខ្លួនឱ្យមានកាន់តែច្រើន នៅក្នុងប្រទេសកម្ពុជា លោក អគ្គនាយករងរូបនេះ ក៏មានក្តីសង្ឃឹមក្នុងការបន្តមហិច្ឆតារបស់ក្រុមហ៊ុន ក្នុងដំណើរឆ្ពោះទៅក្លាយជាក្រុមហ៊ុនផលិតឱសថដែលមានអាយុ១០០ឆ្នាំតាមរយៈការបន្តកែច្នៃឱសថច្រើនជម្រើសបន្ថែមទៀត និងផ្តោតការយកចិត្តទុកដាក់ខ្ពស់លើសុខភាពអ្នកប្រើប្រាស់៕ដោយ៖ស តារា
