ភ្នំពេញ៖ លោកអូស្មាន ហាស្សាន់ រដ្ឋមន្រ្តីប្រតិភូអមនាយករដ្ឋមន្រ្តី និងរដ្ឋលេខាធិការក្រសួងការងារ បណ្ដុះបណ្ដាលវិជ្ជាជីវៈ និងជាប្រធានអង្គការមូលនិធិអភិវឌ្ឍន៍មុស្លិមកម្ពុជា បាននាំយកអំណោយមនុស្សធម៌ក្នុងខែបួសរ៉ាម៉ាឌនរបស់អង្គការបារំាង LIFE មកចែកជូនបងប្អូនទីទ័លក្រីក្រខ្មែរអ៊ិស្លាមចំនួន១០០គ្រួសារ ស្ថិតនៅ សង្កាត់ជ្រោយចង្វា ខណ្ឌជ្រោយចង្វា ។ ពិធីនេះបានធ្វើឡើងនៅព្រឹកថ្ងៃទី២៧ ខែមិថុនា ឆ្នំា២០១៦ ស្ថិតនៅវិហារអ៊ិស្លាម ភូមិឯករង្សី សង្កាត់ជ្រោយចង្វា។
អំណោយមនុស្សធម៌ដែលយកមកចែកជូនបងប្អូនខ្មែរអ៊ិស្លាមនៅពេលនេះ ក្នុងមួយគ្រួសារទទួលបាន អង្ករ២៥គីឡូ,មីឡូ៤កំប៉ុង, ស្ករសរ៣គីឡូក្រាម ,ប្រេងឆា២លីត្រ, មី១កេះធំ ,ត្រីខមួយយូរ, ទឹកដោះគោមួយយួរ, មីម៉ាម៉ាមួយកេះ និងថវិកា២ម៉ឺនរៀលផងដែរ។ អំណោយដែលយកមកប្រគល់ជូននៅពេលនេះ ជាការឧបត្ថម្ភរបស់ប្រជាជនសាសនិកអ៊ិស្លាមនៅប្រទេសបារាំង តាមរយៈអង្គការសម្ព័ន្ធអ៊ិស្លាមបារាំងដើម្បីអប់រំ (LIFE)។
លោក អូស្មាន ហាស្សាន់ បានបញ្ជាក់ថា៖ ក្នុងឳកាសខែបួសរ៉ាម៉ាឌន របស់សាសនាអ៊ិស្លាមនេះ អង្គការបារំាង LIFE ជាអង្គការដៃគូរ ជាមួយអង្គការមូនិធិអភិវឌ្ឍន៍មុស្លិមកម្ពុជា ដែលកាលពីពេលថ្មីៗនេះ អង្គការមួយនេះក៏បានផ្តល់ជូនសហគមន៍ នូវអណ្តូងទឹកអនាម័យ និងចែកអំណោយជូនប្រជាជនក្រីក្រ មួយចំនួនផងដែរ ។ លោកបន្ដថា៖ ក្នុងនាមតំណាងជួសមុខឲ្យបងប្អូនខ្មែរអ៊ិស្លាមទំាងអស់ លោកសូមអគុណដល់ភាគីម្ចាស់ជំនួយ ដែលដឹកនាំដោយលោក Ali Tuati បានគិតគូរ និងដឹងពីទុកធុរៈ និងសុខុមាលភាពរបស់ប្រជាពលរដ្ឋក្រីក្រនៅសហគមន៍ដែលកំពុងខ្វះខាតនូវសម្ភារៈ និងថវិកាដើម្បីយកមកដោះស្រាយជីវភាពបានមួយគ្រាក្នុងឳកាសនៃខែបួសរ៉ាម៉ាឌនរបស់សាសនាអ៊ិស្លាមនេះ ។
លោក អូស្មាន ហាស្សាន់ បានបញ្ជាក់ថា៖ សមិទ្ធផលទាំងនេះក៏មានការខិតខំប្រឹងប្រែងរបស់សមាគម និងសហគមន៍អ៊ិស្លាមដែលបានទទួលអំណោយនានា ពីសប្បុរសជនអន្តរជាតិ ដើម្បីយកមកកសាងអភិវឌ្ឍន៍ប្រទេសជាតិឲ្យមានការីកចម្រើន។ នេះក៏ដោយសារតែប្រទេសជាតិមានសុខសន្តិភាព សុខដុមរមនា គ្មានការរើសអើងពីរាជរដ្ឋាភិបាលកម្ពុជា ក្រោមការដឹកនាំរបស់ សម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្រ្តី នៃព្រះរាជាណាចក្រកម្ពុជា។ក្នុងនាមសហគមន៍ ខ្មែរអ៊ីស្លាមទំាងមូលលោកមានមោទនៈភាពណាស់ ជាមួយរាជរដ្ឋាភិបាលកម្ពុជាក្រោមការដឹកនាំដោយសម្តេចអគ្គមហាសេនាបតីតេជោហ៊ុន សែន ដែលធ្វើឲ្យប្រទេសជាតិពីមុនមកធ្លាប់តែជាវាលពិឃាត ការកាប់សម្លាប់ រង្គាល មនុស្ស ពូជសាស្រ្ដជាតិឯង សង្រ្គាមរ៉ាំរ៉ៃ កន្លងមក ។
សម្ដេចបានខិតខំប្រែក្លាយពីរបបរដ៏ខ្មៅងងឹតឲ្យទៅជាប្រទេសមួយមានសុខសន្តិភាព មានសុខដុមរមនា ដល់សង្គមជាតិ និងផ្ដល់សេក្ដីសុខសាន្ដ ដល់បងប្អូន ប្រជាពលរដ្ឋទូទៅ។ ការរស់រានប្រកបមុខរបរស្របតាមប្រជាធិបតេយ្យពេញលេញ ការគោរពសិទ្ធិមនុស្ស សិទ្ធិជំនឿសាសនា រហូតដល់សព្វថ្ងៃនេះ បច្ចុប្បន្ន ពុំមានប្រទេសណាមួយ ផ្តល់ភាពកក់ក្តៅ និងធ្វើការគ្រប់គ្រង ជំនឿសាសនា ផ្ដល់ភាព សុខដុមរមនា របស់ខ្លួនគ្រប់ជាតិសាសន៍ ដូចដែលកម្ពុជាបាន និងកំពុងធ្វើនោះឡើយ ៕
ដោយ៖ សំរិត
