ខេត្តក្រចេះ៖ រថយន្ដសាំយ៉ុង៣គ្រឿង ដឹកគ្រឿងសង្ហារិមកែច្នៃលួចបង្កប់ឈើ ប្រណីតកំពុងសំងំលាក់ខ្លួននៅក្នុងស្រុកសម្បូណ៌ដើម្បីត្រៀមចេញដំណើរនៅ ពេលយប់ ។
បើតាមសេចក្ដីរាយការណ៍ពីប្រជាពលរដ្ឋបានឲ្យដឹងថា នៅវេលាម៉ោង១រសៀលថ្ងៃទី២ ខែកក្កដា ឆ្នាំ២០១៦នេះ នៅចំណុចផ្លូវចូល (ក្រុមហ៊ុនតុងមិន) ស្ថិតនៅភូមិស្រែត្រែង ឃុំក្បាលដំរី ស្រុកសម្បូណ៌ ខេត្ត ក្រចេះមានរថយន្តសាំយ៉ុង៣គ្រឿង ដែលដឹកឈើពេញព្រៀបនោះពួកគេពុំហ៊ានចេញដំណើរនៅពេលថ្ងៃនោះទេខ្លាចសមត្ថកិច្ចចាប់ ពីព្រោះប៉ុន្មានថ្ងៃមុននេះកម្លាំងសមត្ថកិច្ចបានចាប់រយន្តសាំយ៉ុងដឹកឈើប្រភេទលេខ១ចំនួន១៣គ្រឿងឯណោះ ។ ដូច្នេះ ក្រុមឈ្មួញទាំងនោះបានសម្រេចចិត្តសំងំលាក់ខ្លួនមួយរយៈចាំយប់បន្តិច ទើបចេញ ដំណើរ។
ក្រោយពីបានទទូលដំណឹងនេះ អ្នកយកព័ត៌មានបានទៅដល់កន្លែងដែល រថយន្តទាំង៣គ្រឿងលាក់ខ្លួនដើម្បីថត យករូបភាព ហើយទូរស័ព្ទទៅលោក លឹម ចន្ថា នាយសង្កាត់រដ្ឋបាលព្រៃឈើស្រុក សណ្ដាន់ដើម្បីឲ្យលោកចុះទៅពិនិត្យមើលថា តើរថយន្ដទាំងនោះមានច្បាប់ដឹកជញ្ជូនឈើឬអត់? ប៉ុន្តែទូរស័ព្ទចូលជាច្រើនដងគ្មានអ្នកទទួលឡើយ ។
បើតាមសម្ដីពលរដ្ឋនៅក្បែរនោះបាន និយាយថា រថយន្តទាំង៣គ្រឿងខាងលើ នេះម្ចាស់បានបង់លុយប្រចាំខែឲ្យមេព្រៃ អស់ហើយ ។
ប្រជាពលរដ្ឋបានបន្តថា រថយន្តដឹក ឈើ២គ្រឿងមានម្ចាស់ឈ្មោះ វ៉ា មានផ្ទះ នៅភូមិឫស្សីចារ ឃុំថ្មគ្រែ ។ ចំណែកមួយ គ្រឿងទៀតជារបស់ឈ្មោះ មន្ទី រស់នៅ ភូមិឃុំជាមួយគ្នា។ ប្រជាពលរដ្ឋបានបន្ត ទៀតថា រថយន្តទាំងនោះនៅតែលាក់ខ្លួននៅទីកន្លែងនោះរហូតដល់ពេលល្ងាចទើបចេញដំណើរ ហើយគ្មានមន្រ្តីជំនាញណា ហ៊ានមកក្បែរ ឬបង្ក្រាបឡើយ ព្រោះខ្លាច បាត់លាភសក្ការ ៕
ដោយ៖ ហេង នរិន្ទ្រ
