ភ្នំពេញ៖ បុរស២នាក់បានរងរបួសយ៉ាងធ្ងន់ធ្ងរ ហើយត្រូវបានរថយន្តសង្គ្រោះបន្ទាន់ដឹកយកទៅសង្គ្រោះនៅមន្ទីរពេទ្យភ្លាមៗ ដោយសារតែជិះម៉ូតូទៅបុកជាមួយនិងរថយន្តដែលបើកបញ្ច្រាស់ទិសគ្នាយ៉ាងពេញទំហឹង។

ហេតុការណ៍គ្រោះថ្នាក់ចរាចរណ៍នេះបានបង្កឲ្យមានការភ្ញាក់ផ្អើលដល់ប្រជាពលរដ្ឋកាលពីវេលាម៉ោង២២និង១៥នាទីយប់ ថ្ងៃទី០៣ ខែកក្កដា ឆ្នាំ២០១៦ នៅតាមបណ្ដោយផ្លូវព្រះសីុសុវត្តិ ស្ថិតក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។

ប្រភពព័ត៌មានពីប្រជាពលរដ្ឋឃើញហេតុការណ៍នេះបានឲ្យដឹងថា ដំបូងគឺមានបុរសពីរនាក់ជិះម៉ូូតូមួយគ្រឿងម៉ាកSL ពណ៌ទឹកប្រាក់ ពាក់ស្លាកលេខភ្នំពេញ1AM.6003 ឌុបគ្នាតាមបណ្ដោយផ្លូវព្រះសីុសុវត្តិ ទិសដៅពីជើងទៅត្បួងក្នុងល្បឿនលឿន ខណៈមកដល់ចំណុចកើតហេតុ ក៏បុកជាមួយរថយន្តឡិចស៊ីុសLX470 ពណ៌ខ្មៅ ពាក់ស្លាកលេខភ្នំពេញ2K.2375 ដែលបើកក្នុងទិសដៅបញ្ច្រាស់គ្នាក្នុងល្បឿនលឿនដូចគ្នា នៅចំពាក់កណ្ដាលផ្លូវ យ៉ាងពេញទំហឹងបណ្ដាលឲ្យភាគីខាងម៉ូតូរងរបួសយ៉ាងធ្ងន់ធ្ងរទាំងពីរនាក់ រីឯខាងភាគីរថយន្តមិនមានអ្នករងរបួសនោះទេហើយបានចុះពីលើរថយន្តរត់គេចខ្លួនបាត់ស្រមោល។

ក្រោយកើតហេតុ រថយន្តសង្គ្រោះបន្ទាន់បានមកដឹកជនរងគ្រោះទាំងពីរនាក់យកទៅមន្ទីរពេទ្យភ្លាមៗ រីឯម៉ូតូនិងរថយន្តរងការខូចខាតដូចគ្នា ហើយត្រូវបានសមត្ថកិច្ចជំនាញមកធ្វើការវាស់វែងយកទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញរងចាំដោះស្រាយគ្នានៅពេលក្រោយ៕

ដោយ៖ ព្រែកជ័យ