ភ្នំពេញ៖ ជនសង្ស័យ២នាក់ប្រដាប់ដោយកាំភ្លើងខ្លីមិនស្គាល់ម៉ាកមួយដើម បានធ្វើសកម្មភាពភ្ជង់គំរាមប្លន់យកម៉ូតូម៉ាក Zoomer-X ស៊េរីថ្មីមួយគ្រឿងពីនារីវ័យម្នាក់ទើបនិងចេញពីរៀនភ្លេងនៅសាលាជ័យថាវី ។

ហេតុការណ៍នេះកាលពីវេលាម៉ោង៨និង១០នាទីយប់ថ្ងៃទី ៥ ខែកក្កដា ឆ្នាំ២០១៦ នៅចំណុចផ្លូវបេតុងភូមិប៉ប្រកខាងជើង សង្កាត់កាកាប ខណ្ឌពោធិ៍សែនជ័យ ។

នារីរងគ្រោះជាម្ចាស់ម៉ូតូឈ្មោះ ហេង ស្រីនុត អាយុ១៧ ជាសិស្សសាលាសន្ធរម៉ុក ស្នាក់នៅភូមិកើតហេតុ មានស្រុកកំណើតនៅភូមិ មិត្តភាព ឃុំ ព្រែកឯង ស្រុកកៀនស្វាយ ខេត្តកណ្តាល ។ រីឯម៉ូតូដែលបាត់បង់ម៉ាក Zoomer -X ពណ៍ ស ស្លាកលេខ 1FO-0171 ។

តាមប្រភពពីក្មេងស្រីរងគ្រោះបានឲ្យដឹងថា នៅមុនពេលកើតហេតុ រូបនាងបានចេញពីរៀននៅសាលាវិទ្យាល័យ ជា ស៊ីម សន្ធរម៉ុក ហើយបានបន្តទៅរៀនភ្លេងនៅសាលាជ័យថាវីបាក់ទូក លុះចប់ម៉ោងរូបនាង ជិះម៉ូតូត្រឡប់មកផ្ទះវិញ ខណៈជិះមកដល់ចំណុចផ្លូវបត់ចូលផ្ទះ ភូមិប៉ប្រកខាងជើងក៏មានជនសង្ស័យ២នាក់ ជិះម៉ូតូម៉ាកសង់សេ១២៥ ពណ៌ខ្មៅមិនចាំស្លាកលេខ តាមមកពីក្រោយកាក់ពីមុខម៉ូតូ ស្រែកឲ្យឈប់ហើយជនសង្ស័យម្នាក់ដែលជិះពីក្រោយបានដកកាំភ្លើងខ្លីមួយដើមមិនស្គាល់ម៉ាកមកភ្ជង់ឲ្យនាងចុះពីម៉ូតូ រួចជនសង្ស័យបានឡើងជិះចេញទៅដោយសុវត្ថិភាព ។

ក្រោយពេលកើតហេតុជនរងគ្រោះបានទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលសង្កាត់កាកាបដើម្បីកំណត់មុខសញ្ញាតាមចាប់ជនសង្ស័យយកមកផ្តន្ទាទោសទៅតាមច្បាប់៕​

ដោយ៖ សុខាសែនជ័យ