ភ្នំពេញៈ ចោរលួចម៉ូតូម្នាក់ត្រូវបានកម្លាំងសមត្ថកិច្ចនគរបាលប៉ុស្តិ៍ផ្សារដើមថ្កូវឃាត់ខ្លួន ក្រោយពីរូបគេធ្វើសកម្មភាពលួចយកបានម៉ូតូម៉ាកស្គូពី ពីខាងមុខក្រុមហ៊ុន ហុងដា មួយកន្លែងនៅក្នុងសង្កាត់ផ្សារដើមថ្កូវ ហើយម្ចាស់គេទាន់នោះ។ ហេតុការណ៍នេះបានបង្ករអោយមានការភ្ញាក់ផ្អើលកើតឡើងកាលពីវេលាម៉ោង ២និង៣០នាទីរសៀល ថ្ងៃទី ១១ ខែកក្កដា ឆ្នាំ២០១៦ តាមបណ្តោយផ្លូវព្រះមុនីវង្ស សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ។

ជនសង្ស័យមានឈ្មោះ អុល កៀន អាយុ ២៤ឆ្នាំ មុខរបរចុងភៅហាង ស្នាក់នៅផ្ទះជួលនៅម្តុំអតីតរោងកុនគីរីរម្យ ក្នុងសង្កាត់បឹងកេងកងទី២ ខណ្ឌចំការមន
តាមប្រភពព័ត៌មានពីសមត្ថកិច្ចបានប្រាប់ឱ្យដឹងថា ជនសង្ស័យបានធ្វើសកម្មភាពលួចយកម៉ូតូម៉ាកស្គូពី ព៌ណខ្មៅលាយក្រហម ពាក់ស្លាកលេខភ្នំពេញ១FK-៥៨៤៨ មួយគ្រឿងនៅនិងកន្លែងកើតហេតុខាងលើបន្ទាប់ពីជនរងគ្រោះជាបុគ្គលិករបស់ក្រុមហ៊ុនហុងដា ម្នាក់ដែលមានទីតាំងនៅតាមបណ្តោយផ្លូវព្រះមុនីវង្ស សង្កាត់ផ្សារដើមថ្កូវ ខណ្ឌចំការមន បានចតម៉ូតូដោយភ្លេចដកកូនសោរចេញពីម៉ូតូរបស់ខ្លួន នោះក៏ត្រូវបុរសជាជនសង្ស័យដើរមកដល់ហើយបានឡើងជិះមូ៉តូរត់តែម្តង។ តាមប្រភពដដែលបានប្រាប់បន្តទៀតថា ពេលដែលបុរសជាជនសង្ស័យធ្វើសកម្មភាពលួច និងជិះម៉ូតូយកចេញនោះ ក៏ត្រូវបុគ្គលិកដូចគ្នាបានឃើញ និងស្រែកឆោឡើង និងនាំគ្នាជិះម៉ូតូដេញតាមលុះមកដល់ចំនុចខាងលើក៏តាមទាន់និងចាប់ខ្លួនបាននៅខាងមុខវត្តសន្សំកុសល សង្កាត់បឹងទំពុន ខណ្ឌមានជ័យទើបជនរងគ្រោះប្រគល់អោយនគរបាលប៉ុស្តិ៍ផ្សារដើមថ្កូវតែម្តង។
ក្រោយពេលកើតហេតុ ម៉ូតូម៉ាកស្គូពីខាងលើត្រូវបានប្រគល់ទៅអោយបុរសជាម្ចាស់វិញ ចំណែកជនសង្ស័យត្រូវបានសមត្ថកិច្ចបុ៉ស្តិ៍ផ្សារដើមថ្កូវបញ្ជូនខ្លួនទៅកាន់អធិការដ្ឋាននគរបាលខណ្ឌចំការមន ដើម្បីចាត់ការទៅតាមផ្លូវច្បាប់៕

ដោយ ស រស្មី