ភ្នំពេញ៖ ថ្នាំញៀនប្រភេទម៉ាទឹកកកចំនួន៩កញ្ចប់និងស្រ្តីម្នាក់ត្រូវបានកម្លាំងនគរបាលប៉ុស្តិ៍ស្រះចក ធ្វើការឃាត់ខ្លួនបន្ទាប់ពីស្ត្រីរូបនោះបានធ្វើសកម្មភាពចែកចាយគ្រឿងញៀនយ៉ាងសកម្មនៅចំណុចផ្លូវរថភ្លើង ដែលជាតំបន់ស្មុកស្មាញផងដែរ។

ករណីបង្ក្រាបខាងលើនេះបានធ្វើឡើងកាលពីវេលាម៉ោង១០ព្រឹកនៅថ្ងៃទី២៦ ខែកក្ដដា ឆ្នាំ២០១៦ នៅចំណុចភូមិ២ ផ្លូវរថភ្លើងក្បែរកាប៊ីនភ្លើងទល់មុខក្តាន់ពីរ ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។

មន្រ្តីនគរបាលប៉ុស្តិ៍ស្រះចកបានឲ្យដឹងថា ស្ត្រីសង្ស័យដែរត្រូវឃាត់ខ្លួនឈ្មោះប្រាក់ លីន អាយុ៣១ឆ្នាំ មុខរបរមិនពិតប្រាកដ ស្នាក់ផ្ទះជួល ភូមិ៣ ផ្លូវរថភ្លើង សង្កាត់ស្រះចក ខណ្ឌដូនពេញ រាជធានីភ្នំពេញ ។ ចំណែកឯវត្តុតាងចាប់យកបានរួមមាន៖ ម្សៅក្រាមពណ៌សថ្លា (ម៉ាទឹកកក) ចំនួន៩កញ្ចប់តូច, លុយខ្មែរចំនួន ៤២ ០០០រៀល, ទូរស័ព្ទម៉ាកIphone 5 មួយគ្រឿង។

ប្រភពដដែលបានបន្តទៀតថា នៅមុនពេលឃាត់ខ្លួនស្រ្តីសង្ស័យខាងលើនេះ គឺកម្លាំងកងរាជអាវុធហត្ថរាជធានីភ្នំពេញ បានធ្វើការស្រាវជ្រាវកំណត់មុខជនសង្ស័យនេះ និងទទួលបានព័ត៌មានថាជនសង្ស័យកំពុងតែធ្វើសកម្មភាពចែកចាយគ្រឿងញៀននៅចំណុចខាងលើ ក៏ចុះប្រតិបត្តិបង្ក្រាបឃាត់ខ្លួនស្ត្រីសង្ស័យនេះ ព្រមទាំងចាប់យកថ្នាំញៀនប្រភេទម៉ាទឹកកកចំនួន៩កញ្ចប់តូចជាក់ស្តែងផងដែរ។

បច្ចុប្បន្នស្ត្រីសង្ស័យកំពុងឃាត់ខ្លួនបណ្ដោះអាសន្ន នៅអធិការដ្ឋាននគរបាលខណ្ឌដូនពេញ ដើម្បីធ្វើការសាកសួរកសាងសំណុំរឿងចាត់ការតាមនិតីវិធីនៃច្បាប់៕

ដោយ៖ ស ដារ៉ា