ខ្សែប្រយុទ្ធចំណូលថ្មីរបស់ក្លិបបិសាចក្រហម Manchester Unitedកីឡាករ Zlatan Ibrahimovic បានបញ្ជាក់ថាគាត់ពិតជា ចង់បានខ្សែបម្រើសញ្ជាតិបារាំង Paul Pogba មកលេងជាមួយដើម្បីឲ្យក្លិបបិសាចក្រហមកាន់តែបង្កើនការចាប់អារម្មណ៍ខ្លាំងថែមទៀតពីសំណាក់អ្នកគាំទ្របាល់ទាត់។

ព័ត៌មានក្រៅផ្លូវការបានឲ្យដឹងថា កីឡាករ Paul Pogba របស់ក្លិបសេះបង្កង់ Juventus ជិតឈានដល់កិច្ចព្រមព្រៀងផ្លាស់មកកាន់ក្រុម Manchester United វិញនៅក្នុងតម្លៃខ្លួនដល់ទៅ១០០លានផោន។ កីឡាករ វ័យ៣៤ឆ្នាំ Ibrahimovic បានថ្លែងថា “ខ្ញុំជឿថា Paul Pogba អាចនឹងជួយបង្កើន សមត្ថភាពក្រុម និងធ្វើឲ្យក្រុមនេះមានការចាប់អារម្មណ៍កាន់តែខ្លាំងឡើង”។

ចំណែកនៅក្នុងសហរដ្ឋអាមេរិក ឯណោះវិញ កីឡាករ Paul Pogba បានចុះ ហត្ថលេខារបស់ខ្លួនលើអាវយឺតរបស់អ្នកគាំទ្របាល់ទាត់ក្លិបបិសាចក្រហមមួយ ដោយមានឈ្មោះ Pogba និងស្លាកលេខ៦ ថែមទៀតផង។

ចំណែកលោក Arsene Wenger គ្រូបង្វឹក របស់ក្រុមកាំភ្លើងធំ Arsenal បានផ្តល់មតិយោបល់ថាវាគឺជារឿងដែលឆ្កួតលេលា បំផុតដែលទៅទិញកីឡាករ Paul Pogba ក្នុងតម្លៃរហូតដល់ទៅ១០០លានផោន។ ប៉ុន្តែបើគិតលើប្រាក់ចំណូលរបស់ក្លិប បិសាចក្រហមពួកគេអាចលៃលកទិញ កីឡាករក្នុងតម្លៃខ្លួនខ្ពស់បែបនេះបាន។

គួរបញ្ជាក់ថា ប្រសិនបើក្រុមបិសាច ក្រហមហ៊ានទិញកីឡាករ Paul Pogba ក្នុង តម្លៃខ្លួន១២០លានអឺរ៉ូនេះមែនរូបគេនឹង បំបែកកំណត់ត្រាថ្មីរបស់ពិភពលោកដែលមានតម្លៃខ្លួនខ្ពស់ជាងគេបំផុតលើសតម្លៃខ្លួន Gareth Bale ពេលផ្លាស់ពីក្រុម Tottenham ទៅកាន់Real Madridទៅទៀត ៕

ដោយ៖ ដេវីត