សហព័ន្ធបាល់ទាត់នៃប្រទេសអាហ្សង់ទីន (AFA)បានប្រកាសតែងតាំងលោក Edgardo Bauza ជាគ្រូបង្វឹកថ្មីដើម្បីជំនួស លោក Gerardo Martino ដែលបានលាឈប់ ។

លោក Edgardo Bauza ជាគ្រូបង្វឹកក្លិប Sao Paulo ក្នុងប្រទេសប្រេស៊ីលតែគាត់ បានលាឈប់ដើម្បីមកកាន់តំណែងជាគ្រូបង្វឹកក្រុមជម្រើសជាតិអាហ្សង់ទីនវិញ។ ចំណែកគ្រូបង្វឹកជម្រើសជាតិចាស់លោកGerardo Martino បានលាលែងចេញពី តំណែងភ្លាមក្រោយចប់កម្មវិធីពានរង្វាន់ទ្វីបអាមេរិកខាងត្បូង Copa America ឆ្នាំ២០១៦ដោយក្រុមអាហ្សង់ទីនចាញ់ក្រុមឈីលីដោយបាល់ប៉េណាល់ទីនៅវគ្គផ្តាច់ព្រ័ត្រ។

សហព័ន្ធបាល់ទាត់ប្រទេសអាហ្សង់ទីនបានចេញសេចក្តីថ្លែងការណ៍មួយថា “យើងប្រកាសតែងតាំងលោក Edgardo Bauza ជាគ្រូបង្វឹកថ្មី។ យើងបានសម្ភាសន៍បេក្ខជនជាច្រើនរូបតែចុងក្រោយគឺយើង ជ្រើសរើសយកលោក Edgardo Bauza”។

លោក Edgardo Bauza បានមកដឹកនាំក្រុមយក្សរបស់ប្រេស៊ីល Sao Paulo នៅ ក្នុងឆ្នាំ២០១៥ និងជួយក្រុមនេះឈានទៅលេងវគ្គពាក់កណ្តាលផ្តាច់ព្រ័ត្រនៃកម្មវិធីCopa Libertadores ឆ្នាំនេះ។ គាត់បានដឹក នាំក្រុម San Lorenzo របស់អាហ្សង់ ទីនឈ្នះជើងឯក Copa Libertadores ឆ្នាំ ២០១៤ ៕

ដោយ៖ ដេវីត