ភ្នំពេញ៖បុរសជាអ្នករត់រ៉ឺម៉កម៉ូតូកង់បីម្នាក់ បានរងរបួស ខណះកំពុងតែដឹកម៉ូយនៅតាមដងផ្លូវសុខៗ ក៏ស្រាប់តែមានរថយន្តមួយគ្រឿងបើកមកបុកពីក្រោយពេញទំហឹងបណ្ដាលឲ្យម្ចាស់រឺម៉កកង់បីរងរបួសគ្រិចជើងម្ខាង តែសំណាងល្អមិនបណ្ដាលឲ្យនណារម្នាក់ប៉ះពាល់ដល់ជីវិត។ ហេតុការណ៍នេះបានកើតឡើងកាលពីវេលាម៉ោង១០និង១០នាទីយប់ ថ្ងៃទី៤ ខែសីហា ឆ្នាំ២០១៦ នៅតាមបណ្ដោយផ្លូវ៥១ ក្បែរនិងកែងផ្លូវ១៥៤ ស្ថិតក្នុងសង្កាត់ផ្សារថ្មី៣ ខណ្ឌដូនពេញ រាជធានីផ្នំពេញ។
ប្រភពព័ត៌មានពីប្រជាពលរដ្ឋដែលរស់នៅក្បែរកន្លែងកើតហេតុបានប្រាប់ឲ្យដឹងថា នៅមុនពេលកើតហេតុគឺគេបានឃើញរឺម៉កម៉ូតូកង់បី បានបើកនិងដឹកម៉ូយនៅតាមដងផ្លូវក្នុងទិសដៅពីជើងទៅត្បួង ខណះកំពុងបើកសុខៗ ក៏ស្រាប់តែមានរថយន្តម៉ាកវីហ្គោ ពណ៌ខ្មៅ ពាក់ស្លាកលេខភ្នំពេញ2W.1985 បានបើកបរស្របទិសគ្នា ក្នុងល្បឿនលឿន ហើយមិនប្រយ័ត្នក៏ជ្រុលចង្កូតមកបុករឺម៉កម៉ូតូកង់បីពីក្រោយពេញទំហឹងបណ្ដាលឲ្យម៉ូយដែលអង្គុយលើរឺម៉ក់ម៉ូតូកង់បីភ័យលួសប្រលឹង ចំណែកម្ចាស់ជាអ្នកបើកបររងរបួសជើងម្ខាងផងដែរ តែសំណាងល្អមិនបណ្ដាលឲ្យនណារម្នាក់គ្រោះថ្នាក់ដល់ជីវិតឡើយ។
សមត្ថកិច្ចប្រាប់ថា សំណាងហើយដែលមិនមានគ្រោះថ្នាក់ដល់អាយុជីវិតអ្នកដ៏ទៃនោះ ហើយគ្រោះថ្នាក់នេះបណ្តាលមកពីការបើកបរធ្វេសប្រហែស ទើបបង្កអោយមានគ្រោះថ្នាក់ដូចនេះ កើតឡើងបាន។
ក្រោយកើតហេតុ ភាគីទាំងសងខាងបានធ្វើការសម្របសម្រួលអស់រយះពេលជាច្រើនម៉ោងទើបត្រូវគ្នាដោយភាគីខាងរថយន្ដព្រមសងថ្លៃការខូចខាតនិងព្យាបាលរបួសទៅអោយខាងរឺម៉កម៉ូតូកង់បីដើម្បីបញ្ចប់រឿងនៅកន្លែងកើតហេតុតែម្ដង៕

ដោយព្រែកជ័យ