ភ្នំពេញ៖ បុរសជនជាតិចិនម្នាក់ស្រវឹងស្រាឡើងជោកជាំហើយបើករថយន្តក្នុងល្បឿនយ៉ាងលឿនក៏រេចង្កូតទៅបុកមូ៉តូរះពេញតាមផ្លូវបណ្ដាលឲ្យមនុស្សប្រុសស្រី៤នាក់រួមទាំងក្មេងតូចម្នាក់ទៀតបានរងរបួសធ្ងន់និងស្រាល ។

ហេតុការណ៍គ្រោះថ្នាក់ចរាចរណ៍នេះបានបង្កឲ្យមានការភ្ញាក់ផ្អើលនៅវេលាម៉ោង៩និង០០នាទីយប់ថ្ងៃទី៤ ខែសីហា ឆ្នាំ២០១៦ ស្ថិតនៅតាមបណ្ដោយផ្លូវឌួងងៀប នៅក្នុងសង្កាត់ ស្ទឹងមានជ័យ ខណ្ឌមានជ័យ ។

តាមប្រភពព័ត៌មានពីកន្លែងកើតហេតុបានប្រាប់ឲ្យដឹងថា នៅមុនពេលកើតហេតុ គេបានឃើញជនជាតិចិនស្រវឹងម្នាក់បើករថយន្តមួយគ្រឿងម៉ាក Atoz តាមបណ្តោយផ្លូវឌួងងៀបយ៉ាងលឿន ក្នុងទិសដៅពីជើងទៅត្បូង លុះបើកមកដល់ជិតផ្លូវវេង ស្រាប់តែជនជាតិចិនដែលស្រវឹងស្រារូបនោះបានបើករថយន្តរ៉េចង្កូតទៅបុករះមូ៉តូ ៤គ្រឿងដែលជិះនៅពីមុខពេញទំហឹងបណ្តាលអោយអ្នកជិះម៉ូតូប្រុសស្រី៤នាក់រងរបួសធ្ងន់ រួមទាំងនៅក្នុងនោះមានក្មេងតូចម្នាក់ផងដែរត្រូវបានរងរបួស ហើយតរថយន្តសង្គ្រោះបន្ទាន់ដឹកយកទៅសង្គ្រោះនៅមន្ទីរពេទ្យភ្លាមៗ ។

ក្រោយពេលកើតហេតុ រថយន្តបង្ករនិងម៉ូតូដែលរងការខូចខាតទាំងអស់នោះ ខាងសមត្ថកិច្ចជំនាញចុះមកវាស់វែងដឹកយកទៅរក្សាទុកនៅស្នងការដ្ឋាននគរបាលខណ្ឌមានជ័យដើម្បីរងចាំដោះស្រាយគ្នាតាមនីតិវិធី ៕

ដោយ៖ ជីម ភារ៉ាដង្កោ