ភ្នំពេញ៖ កម្លាំងអន្តរាគមន៍ខណ្ឌពោធិ៍សែនជ័យបានឃាត់ខ្លួនជនសង្ស័យបាន៦នាក់ក្នុងរយៈពេល១ម៉ោង ២ករណីផ្សេងគ្នា ដោយករណីទី១ ឃាត់បាន២នាក់ដោយម្នាក់ជាអ្នកទិញ និងម្នាក់ជាអ្នកចែកចាយ ដកហូតបានថ្នាំ៣កញ្ចប់តូច ។

ករណីបង្ក្រាបគ្រឿងញៀននេះបានកើតឡើងកាលវេលាម៉ោង៩ និង៣០ថ្ងៃ៥ ខែសីហា ឆ្នាំ២០១៦ នៅចំណុចផ្លូវបេតុងភូមិព្រៃព្រីងខាងត្បូង ក្រោយហាង ST សំលាញ់ សង្កាត់ចោមចៅ ខណ្ឌពោធិ៍សែនជ័យ ។

ករណីទី២នៅវេលាម៉ោង ១០និង២០នាទីយប់ដដែល ឃាត់ជនសង្ស័យបាន៤នាក់ នៅតាមបណ្តោយផ្លូវជាតិលេខ៤ ម្តុំរោងចក្រតំឡើងម៉ូតូ Suzuki ស្ថិតក្នុងសង្កាត់កំបូល ខណ្ឌពោធិ៍សែនជ័យ ដកហូតបានថ្នាំញៀនចំនួន១០ កញ្ចប់តូច និងម៉ូតូសង់ស៊េរី២០១៦មួយគ្រឿង ពាក់ស្លាកលេខ 1FM-5432។

សមត្ថកិច្ចបានឲ្យដឹងថា ករណីទី១ជនសង្ស័យមានគ្នា២នាក់ ម្នាកជាអ្នកចែកចាយឈ្មោះ សូរ សារ័ត្ន ហៅអាប៊ូយ អាយុ៣៤ ឆ្នាំ មានមុខរបរ និងស្នាក់នៅមិនពិតប្រាកដ ជាមុខសញ្ញាចាស់ រីឯម្នាកទៀតជាអ្នកទៅទិញយកមកប្រើប្រាស់ឈ្មោះ វ៉ាន វីវ៉ា អាយុ២២ឆ្នាំ មានទីលំនៅភូមិកើតហេតុខាងលើ មានមុខរបរកម្មកររោងចក្រ ។

ដោយឡែកករណីទី២សមត្ថកិច្ចនៅមិនទាន់ប្រាបឲ្យដឹងអត្តសញ្ញាណនៅឡើយទេ ដោយសារតែមានរឿង២ផ្ទួនគ្នា ទើបមិនបានប្រាប់។ សមត្ថកិច្ចបានបន្តថា មុនឈានដល់ការឃាត់ជនសង្ស័យទាំង៦នាក់នេះគឺកម្លាំងបានល្បាតការពារក្នុងភូមិសាស្ត្រខាងលើ ក៏ប្រទះឃើញជនសង្ស័យទាំងនោះមានការសង្ស័យ បានធ្វើឃាត់ដើម្បីឆែកឆេរ ក៏រកឃើញថ្នាំទាំង១៣កញ្ចប់ ២ករណីផ្សេងគ្នាបែបនេះតែម្តង ។

ក្រោយពេលកើតហេតុជនសង្ស័យទាំង២នាក់ រួមជាមួយវត្ថុតាងត្រូវបានកម្លាំងអន្តរាគមន៍ប្រគល់ឲ្យកម្លាំងផ្នែកជំនាញខណ្ឌកសាងសំណំុរឿងដើម្បីបញ្ជូនទៅតុលាការចាត់ការតាមនីតិវិធីច្បាប់៕

ដោយ៖ សុខាសែនជ័យ