ភ្នំពេញ៖ យុវជន២នាក់ត្រូវបានសមត្ថកិច្ចឃាត់ខ្លួនខណៈដែលពួកគេជិះម៉ូតូគ្មានស្លាកលេខចូលទៅក្នុងប្លុកភូមិត្រពាំងឈូក ។

ករណីឃាត់ខ្លួននេះបានធ្វើឡើងកាលពីវេលាម៉ោង១និង៣០នាទីរសៀលថ្ងៃទី១០ ខែសីហា ឆ្នាំ២០១៦ នៅចណុចភូមិ បុរីកម្មករ (អតីតភូមិត្រពាំងឈូក) សង្កាត់ទឹកថ្លា ខណ្ឌសែនសុខ។

យុវជនទី១-ឈ្មោះ ជឹម សារឿង ភេទប្រុស អាយុ២៨ឆ្នាំ មុខរបរមិនពិតប្រាកដ ស្នាក់នៅភូមិប៉ប្រកខាងជើង សង្កាត់កាកាប ខណ្ឌពោធិសែនជ័យ និងទី២-ឈ្មោះ ជា បញ្ញា ភេទប្រុស អាយុ២៥ឆ្នាំ មុខរបរមិនពិតប្រាកដ ស្នាក់នៅភូមិប៉ប្រកខាងជើង សង្កាត់កាកាប ខណ្ឌពោធិសែនជ័យ មានស្រុកកំណើតស្រុកអង្គតាសោម ខេត្តតាកែវ។

សមត្ថកិច្ចបានឲ្យដឹងថា មុននិងឃាត់ខ្លួនយុវជនទាំងពីនាក់ខាងលើខណៈដែលកម្លាំងសមត្ថកិច្ចបានធ្វើការល្បាតនៅតាមបណ្តោយផ្លូវសហព័ន្ធរុស្សីក៏ប្រទះឃើញជនសង្ស័យជិះម៉ូតូ១គ្រឿងម៉ាក DUKE ពណ៌ខ្មៅលាយស គ្មានស្លាកលេខ ក្នុងទិសដៅពីលិចទៅកើត ហើយក៏ដេញតាមរហូតមកដល់ចំណុចខាងលើបានឃាត់ត្រួតពិនិត្យដោយពុំមានឯកសារគ្រប់គ្រាន់ទើបឃាត់ខ្លួនយកមកសាកសួរនៅប៉ុស្តិ៍នគរបាលទឹកថ្លា។

ក្រោយពីធ្វើការសាកសួរនិងត្រួតពិនិត្យរួចសមត្ថកិច្ចបានដកហូតម៉ូតូទុកបណ្តោះអាសន្ននិងធ្វើសាវដាជាតិឲ្យយុវជនទាំង២នាក់នោះត្រឡប់ទៅផ្ទះវិញដើម្បីយកឯកសារមកយកម៉ូតូត្រឡប់ទៅវិញ។

នៅចំពោះមុខសមត្ថកិច្ចយុវជនទាំង២នាក់បានឆ្លើយថា មុននិងសមត្ថកិច្ចឃាត់ខ្លួនរូបគេបានជិះម៉ូតូខាងលើចេញពីផ្ទះក្នុងគោលបំណងទៅចំណុចខាងលើដើម្បីទិញនំគ្រក់ហូបតែមិនទាន់បានទិញផងស្រាប់តែសមត្ថកិច្ចឃាត់ខ្លួនតែម្តង៕

ដោយ៖ តុង សីហា