ភ្នំពេញ៖ ជនសង្ស័យ២នាក់បានជិះម៉ូតូមួយគ្រឿងឌុបគ្នាដេញតាមនារីជានិសិ្សតនៃសាកលវិទ្យាល័យបៀលប្រាយ៍ម្នាក់ដែលទើបតែចេញពីរៀន រហូតដល់ផ្លូវរៀងស្ងាត់ក៏ដកកាំភ្លើងគំរាមបាញ់ រួចប្លន់យកម៉ូតូជិះគេចខ្លួនបានដោយសុវត្តិភាព។

ករណីប្លន់ម៉ូតូពីនារីម្នាក់ប្រដាប់អាវុធខាងលើនេះបានកើតឡើងនៅវេលាម៉ោង២១និង០៥នាទីយប់ ថ្ងៃទី១៥ ខែសីហា ឆ្នាំ២០១៦ នៅតាមបណ្ដោយផ្លូវ៤៦០ មុខផ្ទះលេខ៨ ស្ថិតនៅក្នុងភូមិ៤ សង្កាត់ទួលទំពូង១ ខណ្ឌចំការមន។

នារីរងគ្រោះមានឈ្មោះលីវ បិវួច ភេទស្រី អាយុ២២ឆ្នាំ មុនរបរជានិសិ្សតឆ្នាំទី១នៅសកលវិទ្យាល័យបៀលប្រាយ៍ មានទីលំនៅផ្ទះលេខ១៩៦E1 ផ្លូវលេខ១៥៥ ភូមិ៤ សង្កាត់ទួលទំពូង១ ខណ្ឌចំការមន ។ រីឯជនសង្ស័យមានគ្នា២នាក់មិនស្គាល់អត្តសញ្ញាណ។

បើតាមសម្ដីនារីរងគ្រោះខាងលើបានប្រាប់ឲ្យដឹងថា នៅមុខពេលកើតហេតុគឺរូបគាត់បានចេញពីរៀននៅសាកលវិទ្យាល័យបៀលប្រាយ៍ ហើយបានជិះម៉ូតូម៉ាកZOOMER X ពណ៌ខៀវ ពាក់ស្លាកលេខភ្នំពេញ1FX.7196 ដើម្បីសំដៅទៅផ្ទះដែលនៅក្បែរនិងកន្លែងកើតហេតុខាងលើ ខណៈជិះជិតដល់ផ្ទះទៅហើយនោះក៏ស្រាប់តែមានជនសង្ស័យ២នាក់ ជិះម៉ូតូមួយគ្រឿងម៉ាកហង់ដាឌ្រី ពណ៌ខ្មៅ តែមិនចាំស្លាកលេខ ជិះឌុបគ្នាតាមមកពីក្រោយហើយកាក់ចំពីមុខម៉ូតូរូបនាង រួចដកកាំភ្លើងខ្លីនិងនិយាយថានិងបាញ់ចោល ភា្លមនោះនារីជនរងគ្រោះភ័យខ្លាំងពេកក៏ចុះពីលើម៉ូតូ ហើយជនសង្ស័យក៏ឡើងជិះម៉ូតូគេចខ្លូនបាត់បានដោយសុវត្តិភាពតែម្ដង។

ក្រោយពេលកើតហេតុជនរងគ្រោះត្រូវបានកម្លាំងកងរាជអាវុធហត្ថខណ្ឌចំការមន ចុះទៅដឹករូបនាងមកដាក់ពាក្យបណ្ដឹង ដើម្បីកំណត់មុខសញ្ញាតាមចាប់ជនសង្ស័យ៕

  

ដោយ៖ ជីម ភារ៉ា ដង្កោ