ភ្នំពេញ៖ បើយោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា នៅក្នុងឆ្នាំ២០២៤កន្លងទៅ កម្ពុជាទទួលបានចំណូលជាង ៥ ពាន់លានដុល្លារ (៥,៣) ពីការនាំចេញកសិផលប្រមាណ ១២ លានតោន ទៅកាន់ ៩៥ ប្រទេស កើនឡើងជាង ៣ លានតោន ធៀបនឹងឆ្នាំ ២០២៣។
បើតាមប្រសាសន៍របស់រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ឌិត ទីណា ថ្លែងនៅក្នុងពិធីសន្និបាតបូកសរុបការងារកសិកម្ម រុក្ខាប្រមាញ់ និងនេសាទទូទាំងប្រទេសឆ្នាំ២០២៤ និងទិសដៅអនុវត្តឆ្នាំ២០២៥ កាលពីថ្ងៃទី២២ ខែមករា ឆ្នាំ២០២៥ម្សិលមិញនេះថា អនុវិស័យដំណាំ បានចូលរួមធំជាងគេនៅក្នុងវិស័យកសិកម្មទាំងមូល រហូតដល់ ៦១% ក្នុងឆ្នាំ ២០២៤ សម្រេចបានផលិតកម្មចំនួន ៣៩,៤ លានតោន កើនឡើង ២,៥៩ លានតោន ធៀបនឹងឆ្នាំ ២០២៣។
ផលិតកម្មស្រូវសម្រេចបាន ១៣,៨៩ លានតោន ដែលធានាបានទាំងស្រុងនូវសន្តិសុខស្បៀងកម្ពុជា និងមានអតិរេក ៨,២ លានតោន សម្រាប់ការនាំចេញជាស្រូវ និងអង្ករ។
រដ្ឋមន្ត្រី ឌិត ទីណា បានគូសបញ្ជាក់យ៉ាងដូច្នេះថា៖ «ទោះបីជាមានការប៉ះពាល់ដោយគ្រោះធម្មជាតិ ដូចជាទឹកជំនន់ គ្រោះរាំងស្ងួត ការបំផ្លិចបំផ្លាញដោយរុយស មមាជត្នោត ដង្កូវហ្វូង ដង្កូវមូស្លឹកក៏ដោយ នេះសបញ្ជាក់ឱ្យឃើញថា យើងកាន់តែមានភាព ធន់ទៅនឹងបម្រែបម្រួលអាកាសធាតុក្នុងអនុវិស័យដំណាំ ហើយក៏ជាលទ្ធផលដែលបានបង្កើនការផ្សព្វផ្សារ និងចែក រំលែក បច្ចេកទេសដល់កសិករ ក្នុងការប្រើប្រាស់ ពូជ ជី ថ្នាំ កាន់តែប្រសើរឡើង ព្រមទាំងប្រើប្រាស់បច្ចេកវិទ្យា និងគ្រឿងយន្តកសិកម្មកាន់តែទូលំទូលាយនៅក្នុងផលិតកម្មកសិកម្មកម្ពុជា»។
ផលិតផលកសិកម្មសំខាន់ៗ ដែលនាំចេញពីកម្ពុជារួមមាន៖ ស្រូវ អង្ករ ចេក ដំឡូងមី ស្វាយចន្ទី ផ្លែមៀន ម្រេច និងកសិផលប្រមាណ ១០០ មុខទៀត។
យោងតាមក្រសួងពាណិជ្ជកម្ម ការនាំចេញទំនិញរបស់កម្ពុជាក្នុងឆ្នាំ២០២៤ មានទំហំទឹកប្រាក់សរុបជាង ២៦,១៩ ពាន់លានដុល្លារ កើនឡើង ១៥,៧% ចំណែកឯការនាំទំនិញចូលមកវិញមានទំហំទឹកប្រាក់ ២៨,៥៤ ពាន់លានដុល្លារ កើន ១៨%។
សូមជម្រាបថា ទីផ្សារសំខាន់ៗ ដែលកម្ពុជាបាននាំចេញទំនិញទៅរួមមាន៖ ប្រទេសចិន សហរដ្ឋអាមេរិក វៀតណាម ជប៉ុន ថៃរួមនឹងទីផ្សារសំខាន់ៗមួយចំនួនទៀត៕
ដោយ៖តារា
