ភ្នំពេញ ៖ យ៉ាងហោចណាស់ក៏មានពលរដ្ឋខ្យល់គស្លាប់៣នាក់ និងរបួស៦នាក់ ពេលនាំគ្នាទៅប្រជ្រៀតយកអាំងប៉ាវ នៅមុខផ្ទះអ្នកឧកញ៉ា សុខ គង់ ពិតជារន្ធត់ ហើយក្រុមគ្រូពេទ្យកំពុងសង្គ្រោះ ជាមួយការជួយអន្តរាគមន៍ពីសមត្ថកិច្ច អាជ្ញាធរ នៅកន្លែងកើតហេតុ។
សូមបញ្ជាក់ថា ៖ ប្រជាពលរដ្ឋដែលប្រមូលផ្ដុំប្រជៀតគ្នានៅមុខផ្ទះអ្នកឧកញ៉ា សុខ គង់ ដើម្បីទទួលយកអាំងប៉ាវនៅព្រឹកថ្ងៃទី២៣ ខែមករា ឆ្នាំ២០២៥នេះ បានជួបហេតុការណ៍ខ្យល់គដួលជាបន្ដបន្ទាប់ បណ្ដាលឲ្យមនុស្ស៣នាក់ស្លាប់ពេលបញ្ជូនដល់មន្ទីរពេទ្យ និង៦នាក់ផ្សេងទៀត កំពុងធ្វើការសង្គ្រោះ។ ផ្ទះអ្នកឧកញ៉ា សុខ គង់ ដែលប្រជាពលរដ្ឋនាំគ្នាទៅប្រជ្រៀតប្រមូលផ្ដុំនោះ មានទីតាំងស្ថិតនៅតាមបណ្ដោយមហាវិថីព្រះនរោត្តម សង្កាត់ផ្សារថ្មីទី៣ ខណ្ឌដូនពេញ។
នៅទីតាំងកើតហេតុគេឃើញមានវត្តមានរបស់លោក ឃួង ស្រេង អភិបាលរាជធានីភ្នំពេញ បានដឹកនាំកម្លាំងសមត្ថកិច្ច និងរថយន្ដសង្គ្រោះបន្ទាន់ ដើម្បីជួយអន្ដរាគមន៍សង្គ្រោះប្រជាពលរដ្ឋ និងសម្រួលចរាចរណ៍បំបែកនូវការជួបជុំនោះ។
មិនគួរណា ក្តីរំភើប ចង់បានថវិកា ក្លាយទៅជាទុក្ខបែបនេះសោះ ៕

ដោយ ៖ សិលា