ក្រុមអធិរាជស Real Madrid នឹងជួបគូប្រជែងក្នុងស្រុក Leganes ខណៈដែលក្រុមអ្នកមានបុណ្យ Barcelona គ្រោងធ្វើដំណើរទៅជួប Valencia ក្នុងការប្រកួត Copa del Rey វគ្គ១/៤ផ្តាច់ព្រ័ត្រ បន្ទាប់ពីចាប់ឆ្នោតកាលពីថ្ងៃអង្គារកន្លងទៅ។

ចំណែក Atletico Madrid នឹងធ្វើជាម្ចាស់ផ្ទះទទួលក្រុម Getafe ក្នុងការប្រកួតដណ្ដើមកៅអីវគ្គពាក់កណ្តាលផ្តាច់ព្រ័ត្រ ខណៈដែល Real Sociedad នឹងទទួលក្រុម Osasuna។ ការប្រកួតវគ្គ៨ក្រុមចុងក្រោយនៃពានរង្វាន់ខាងលើនឹងត្រូវលេងនៅចន្លោះថ្ងៃទី៤-៦ ខែកុម្ភៈ ឆ្នាំ២០២៥ខាងមុខ។

ការចាប់ឆ្នោតបានបន្សល់ទុកនូវលទ្ធភាពនៃការប្រកួត Clasico រវាងគូប្រជែងចាស់ Real Madrid និង Barcelona ក្នុងវគ្គផ្តាច់ព្រ័ត្រដែលជារឿងដែលមិនបានកើតឡើងអស់រយៈពេលជាងមួយទសវត្សរ៍មកហើយ។

Real និង Barcelona បានជួបគ្នាក្នុងវគ្គផ្តាច់ព្រ័ត្រ Copa del Rey ចំនួន១៨ដង ដោយ Real Madrid នាំមុខគូប្រជែងជាមួយនឹងជ័យជម្នះ១១ដង ខណៈ Barcelona ឈ្នះ៧ដង រួមទាំងការជួបគ្នាចុងក្រោយរបស់ពួកគេ ក្នុងជ័យជម្នះ ២-១ ក្នុងវគ្គផ្តាច់ព្រ័ត្រកាលពីឆ្នាំ២០១៤។

ទោះបីជាយ៉ាងណាក៏ដោយ Barcelona បានយកឈ្នះលើក្រុម Real Madrid ទាំង២ដងដែលពួកគេបានជួបក្នុងរដូវកាលនេះ ដោយបានឈ្នះ ៤-០ នៅ Santiago Bernabeu ក្នុងក្របខ័ណ្ឌ La Liga កាលពីខែតុលា និងជ័យជម្នះ ៥-២ ក្នុងការប្រកួតវគ្គផ្តាច់ព្រ័ត្រ Spanish Super Cup ក្នុងប្រទេសអារ៉ាប៊ីសាអ៊ូឌីតកាលពីសប្តាហ៍មុន។

បច្ចុប្បន្នក្រុម Real Madrid កំពុងឈរកំពូលតារាង La Liga ដោយមាន៤៦ពិន្ទុ នាំមុខក្រុមលេខ២ Atletico Madrid ចំនួន២ពិន្ទុ ខណៈក្រុមលេខ៣ Barcelona ចាញ់ក្រុមកំពូលតារាង៧ពិន្ទុ៕ (រូបភាព ៖ CNA)