កោះកុង៖ ប្រជាពលរដ្ឋដែលរស់នៅក្នុងភូមិ២ ឃុំប៉ាក់ខ្លង ស្រុកមណ្ឌលសីមា ខេត្តកោះកុង បានសំដែងការខកចិត្ត ជាខ្លាំងចំពោះសមត្ថកិច្ចនគរបាលស្រុកមណ្ឌលសីមារួមទាំងកម្លាំងការិយាល័យកណ្តាលប្រឆាំងបទល្មើសគ្រឿងញៀននៃស្នងការដ្ឋាននគរបាលខេត្តកោះកុង ។
បើតាមសេចក្តីរាយការណ៍របស់ប្រជាពលរដ្ឋបានអោយដឹងថា សមត្ថកិច្ចនគរបាលខេត្តកោះកុងរួមទាំងកម្លាំងការិយាល័យកណ្តាល ប្រឆាំងបទល្មើសគ្រឿងញៀននៃស្នងការដ្ឋាននគរបាលខេត្តកោះកុង ហាក់បីដូចជាមានការឃុបឃិតជាមួយនិងក្រុមឈ្មួញរកស៊ីជួញដូរគ្រឿងញៀនអញ្ចឹង ទើបមាន ការបណ្តែតបណ្តោយអោយមានការលក់ដូរពាសពេញទីវត្តអារាមរួមទាំងសាលារៀនផង ។
ប្រភពបានបន្តទៀតថា បើសិនជាមានការបង្ក្រាប គឺសមត្ថកិច្ចបានត្រឹមតែ ធ្វើការឃុំខ្លួនជនសង្ស័យមួយយប់ ឬ ១ទៅ២សប្តាហ៍ប៉ុណ្ណោះ ក៏ឃើញជនសង្ស័យ ទាំងនោះត្រឡប់មកវិញបាត់ទៅហើយ ដូចជាការលែងសៀកឆ្អិនភ្នែកអញ្ចឹង។
ប្រជាពលរដ្ឋក៏បានធ្វើការសំណូមពរ ទៅដល់ស្ថាប័នសមត្ថកិច្ចពាក់ព័ន្ធទាំងអស់មេត្តារឹកបណ្តឹងច្បាប់អោយបាន រឹងមាំជាងនេះបន្តិច កុំអោយចាប់ហើយ លេងមកវិញរបៀបនេះ ព្រោះក្រុមឈ្មួញជួញដូរគ្រឿងញៀនទាំងនោះ ដើរ និយាយយ៉ាងក្រអើតក្រទមថា ប្រសិនជាសមត្ថកិច្ចចាប់ពួកគេយ៉ាងច្រើនណាស់ មួយយប់ ឬ ពីរយប់ប៉ុណ្ណោះ គឺ មេគេទៅលួសមកវិញបាត់ទៅហើយ ។
ជុំវិញករណីចោទប្រកាន់ខាងលើ លោក ជា សារិន អធិការស្រុកមណ្ឌលសីមា បានអោយសារព័ត៌មានយើងដឹងថា ពុំមានការដោះលែងប្រជាពលរដ្ឋចោទប្រកាន់នោះទេ ហើយកាលពីយប់ថ្ងៃទី៣០ ខែកក្កដា កម្លាំងរបស់លោកបាន ហៅក្មេងមួយក្រុម មកធ្វើការពិនិត្យទឹកនោម ហើយបានពិនិត្យឃើញថាមានក្មេងចំនួន ៥នាក់ បានជាប់សារធាតុ ញៀន ហើយក៏បានធ្វើកិច្ចសន្យា និង អញ្ជើញអាណាព្យាបាលអោយមកយកទៅធ្វើការណែនាំអប់រំឡើងវិញ មិន មែនជាករណីចាប់គ្រឿងញៀនដូចប្រជាពលរដ្ឋលើកឡើងនោះទេ ៕ ឆ្លាមសមុទ្រ
