ខេត្តពោធិ៍សាត់៖ យ៉ាងហោចមនុស្សចំនួន៣នាក់បានរងរបួសធ្ងន់ស្រាល នៅក្នុងហេតុការណ៌គ្រោះថ្នាក់ចរាចរណ៍រថយន្តកាមរីបាឡែនបុកគោយន្តកន្ត្រៃពីក្រោយពេញទំហឹង ខណៈកំពុងធ្វើដំណើរស្របទិសគ្នានៅលើកំណាត់ផ្លូវជាតិលេខ៥។

ហេតុការណ៍នេះកើតឡើងកាលពីវេលាម៉ោង៥និង៤៥នាទីព្រឹកថ្ងៃទី១៩ ខែសីហា ឆ្នាំ២០១៦ នៅលើកំណាត់ផ្លូវជាតិលេខ៥ ស្ថិតក្នុងភូមិអូរស្តៅ សង្កាតស្វាយអាត់ ក្រុង-ខេត្តពោធិ៍សាត់ ។

នគរបាលចរាចរណ៍ខេត្តពោធិ៍សាត់បានឲ្យដឹងថា ហេតុការណ៍នេះបង្កឡើងដោយរថយន្ត១គ្រឿងម៉ាក TOYOTA កាមរីបាឡែន ពណ៌សំបកឪឡឹក ពាក់ស្លាកលេខ ភ្នំពេញ 2R-4177 ធ្វើដំណើរលើកំណាត់ផ្លូវជាតិលេខ៥ ក្នុងទិសដៅពីលិចទៅកើត លុះមកដល់ចំណុចកើតហេតុខាងលើបានរេចង្កូតបុកគោយន្តកន្ត្រៃពេញទំហឹង ខណៈកំពុងធ្វើដំណើរស្របទិសគ្នាបណ្ដាលឲ្យរថយន្តបង្ករងការខូចខាតយ៉ាងដំណំ ចំណែកគោយន្តកន្ត្រៃបានធ្លាក់ចូលទឹកស្នាមភ្លោះនិងរងរបួសមនុស្សចំនួន០៣នាក់។

ប្រភពបន្តថា ជនរងរបួសទាំង០៣នាក់ខាងលើ រហូតមកដល់ម៉ោងនេះគេពុំបានបញ្ជាក់ថា ប្រុសប៉ុន្មានស្រីប៉ុន្មាននាក់នោះទេ គ្រាន់តែគេដឹងថា ជនរងរបួសក្នុងចំណោម០៣នាក់នោះធ្ងន់ចំនួន០២នាក់ស្រាលម្នាក់ រស់នៅភូមិបឹងប្រីយ៍ ឃុំត្រពាំងជង ស្រុកបាកាន ខេត្តពោធិ៍សាត់ ទាំងអស់គ្នា ហើយជនរងរបួសទាំង០៣នាក់ខាងលើនោះ ក្រោយកើតហេតុគេបញ្ជូនជនរងរបួសទៅសង្គោះនៅមន្ទីរពេទ្យបង្អែកស្រុកបាកាន។

ប្រភពដដែលបន្តទៀតថា ចំណែកវត្ថុតាងគោយន្តកន្រ្តៃនិងរថយន្តបង្ក ត្រូវបានសមត្ថកិច្ចបញ្ជូនទៅរក្សាទុកនៅការិយាល័យនគរបាលចរាចរណ៍ខេត្តដើម្បីរង់ចាំធ្វើការដោះស្រាយគ្នាជាក្រោយតាមនីតិវិធី៕

ដោយ៖ ប៉ឹម ពិន