ខេត្តកំពង់ឆ្នាំង៖ បុរសម្នាក់បានស្លាប់គៀបជាប់ក្នុងកាប៊ីនរថយន្ត នៅក្នុងឧប្បត្តិហេតុគ្រោះថ្នាក់ចរាចរណ៍មួយដែលបង្កឡើងរវាងរថយន្តដឹកទំនិញពីគ្រឿងបុកគ្នា ។

ហេតុការណ៍ដ៍រន្ធត់នេះបានកើតឡើងនៅវេលាម៉ោង២យប់ឈានចូលថ្ងៃទី២៤ ខែសីហា ឆ្នាំ២០១៦ នៅចន្លោះគីឡូម៉ែត្រលេខ៩៩និង១០០ ស្ថិតក្នុងភូមិថ្មី ឃុំពង្រ ស្រុករលាប្អៀរ ខេត្តកំពង់ឆ្នាំង ។

សមត្ថកិច្ចមូលដ្ឋានបានឲ្យដឹងថា ជនរងគ្រោះដែលស្លាប់ក្នុងឧប្បត្តិហេតុគ្រោះថ្នាក់ចរាចរណ៍នេះមានឈ្មោះ ហ៊ាន ហេង ភេទប្រុស អាយុ៣៧ឆ្នាំ នៅឃុំកាឡៃ ស្រុកលំផាត់ ខេត្តរតនគិរី ។

សមត្ថកិច្ចបានឲ្យដឹងទៀតថា នៅមុនពេលកើតហេតុមានរថយន្តមួយគ្រឿងម៉ាកហ៊ីយ៉ាន់ដាយ ពាក់ស្លាកលេខកំពង់ចាម3A-4103 បានចតស្ងៀមនៅលើចិញ្ចើមផ្លូវ ស្រាប់តែនៅពេលកើតហេតុក៏មានរថយន្តមួយគ្រឿងម៉ាកហ្វីណូ ពណ៌ក្រហម ពាក់ស្លាកលេខប៉ៃលិន 3A-0257 ធ្វើដំណើរក្នុងទិសដៅពីលិចទៅកើតហើយនៅពេលមកដល់ចំណុចកើតហេតុ គេឃើញរថយន្តបានរេចង្កូតទៅបុករថយន្តហ៊ីយ៉ាន់ដាយដែលកំពុងចតស្ងៀម ពីក្រោយពេញមួយទំហឹង ហើយរថយន្តហ្វីណូរួញកាប៊ីនមុខជាប់បុរសម្នាក់នៅក្នុងស្លាប់ភ្លាមៗនៅនឹងកន្លែង ។

ក្រោយពេលកើតហេតុមធ្យោបាយបង្កត្រូវបានយកមករក្សាទុកនៅអធិការនគរបាលស្រុករលាប្អៀរ ដើម្បីធ្វើការដោះស្រាយទៅតាមនីតិវិធី ៕

ដោយ៖ ចន្ថា