ភ្នំពេញ៖ ការបរាជ័យនៅលើទឹកដី ប្រទេសប្រេស៊ីលរបស់ក្រុមប្រតិភូនិងអត្តពលិកកម្ពុជាក្នុងព្រឹត្តិការណ៍ប្រកួតកីឡា អូឡាំពិករដូវក្តៅឆ្នាំ២០១៦នេះបានបន្សល់ ទុកនូវស្លាកស្នាមដ៏ល្វីងជូរចត់សម្រាប់ បេសកកម្មរបស់កម្ពុជា ប៉ុន្តែការសោកសៅនេះបានក្លាយទៅជាមេរៀនមួយដើម្បីត្រៀមខ្លួនឲ្យបានល្អជាងនេះទៀតចំពោះព្រឹត្តិ ការណ៍ដូចគ្នានេះដែលនឹងធ្វើនៅលើទឹកដីជប៉ុនក្នុងទីក្រុងតូក្យូនាឆ្នាំ២០២០ខាងមុខ ។

កីឡាករកីឡាការិនីកម្ពុជាពួកគាត់បានព្យាយាមអស់ពីសមត្ថភាពក្នុងការប្រកួតប្រជែងដណ្តើមយកមេដាយក្នុងគោល បំណងនាំកិត្តិយសជូនជាតិ ប៉ុន្តែធនធាន កម្ពុជាហាក់នៅមានកម្រិត ដូច្នេះអ្វីដែលកើតមាននាពេលនេះគឺជាមេរៀនដែល កម្ពុជាមិនធ្លាប់មានពីមុនមក ។ ក្នុង ចំណោមអត្តពលិកទាំង៦នាក់របស់កម្ពុជាដែលចាញ់ក្នុងព្រឹត្តិការណ៍អូឡាំពិកនោះ គឺកីឡាការិនីចំបាប់ ចូវ សុធារ៉ា ចាញ់ក្រោមថ្វីដៃរបស់កីឡាការិនីកូឡុំប៊ីឈ្មោះ Castillo Hidalgo Carolina ក្នុងលទ្ធផល១០-០ពិន្ទុ វគ្គជម្រុះលើវិញ្ញាសា៤៨គីឡូក្រាម ។ រីឯ កីឡាករហែលទឹក ពូ សុវិជ្ជា និងកីឡា ការិនី ហែម ថុនវិទិនី, កីឡាការិនី លី ណារី និងកីឡាករ នីកូ ផ្នែកអត្តពលកម្មរត់ចម្ងាយ ៤២គីឡូម៉ែត្រព្រមទាំងកីឡាការិនី ស៊ន សៀវម៉ី ប្រកួតវិញ្ញាសាតេក្វាន់ដូដែលជាក្តីសង្ឃឹមចុងក្រោយរបស់កម្ពុជាបានចាញ់ជាបន្តបន្ទាប់ ។

ចំពោះអារម្មណ៍សោកសៅរបស់អត្ត ពលិកកម្ពុជានៅទីក្រុងរីយូ៉ប្រទេសប្រេស៊ីលនេះបានធ្វើឲ្យកម្ពុជាកាន់តែមានជំនឿលើការប្រកួតលើកក្រោយៗ ពិសេសកីឡាអូឡាំពិកដែលធ្វើឡើងក្នុងទីក្រុងតូក្យូប្រទេសជប៉ុននាឆ្នាំ២០២០ខាងមុខនេះ ។ ជាមួយ ការបរាជ័យនេះដែរ កីឡាការិនី ហែមថុន វិទិនី ធ្លាប់សរសេរយ៉ាងវែងអន្លាយនៅក្នុងបណ្តាញទំនាក់ទំនងសង្គមហ្វេសប៊ុករបស់នាងថា កីឡាអូឡាំពិកមិនមែនកីឡាករកីឡា ការិនីម្នាក់ណាចង់ទៅបាននោះទេ ប៉ុន្តែនាងខ្ញុំពិតជារីករាយខ្លាំងនៅពេលដែលនាងខ្ញុំបានបំបែកឯកទគ្គកម្មជាប្រវត្តិសាស្រ្តក្នុង វិញ្ញាសាហែលទឹកចម្ងាយ៥០ម៉ែត្រធ្វើក្នុងថិរវេលាដ៏ល្អ ។ ដោយឡែកកីឡាការិនី ស៊ន សៀវម៉ី ក្រោយពីបរាជ័យនាងបានសុំការយោគយល់ពីសំណាក់ប្រជាពលរដ្ឋខ្មែរគ្រប់រូប ពិសេសថ្នាក់ដឹកនាំនិងមិត្តរួម អាជីព ។

គួរបញ្ជាក់ថា ក្រុមប្រតិភូនិងអត្តពលិកកម្ពុជាទាំងអស់នឹងធ្វើមាតុភូមិនិវត្តន៍មក ដល់ព្រលានយន្តហោះអន្តរជាតិភ្នំពេញ នាវេលាម៉ោង៦និង៤០នាទីល្ងាចថ្ងៃទី២៥ខែសីហា ឆ្នាំ២០១៦ នេះជាមួយលោកវ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា ៕

ដោយ៖ សារីម