ភ្នំពេញ៖ រឿងគ្រោះថ្នាក់ចរាចរណ៍បន្តិចបន្តួចសោះ ស្រាប់តែមានបុរសម្នាក់ខឹងជំនួសបានប្រេីហិង្សាវាយទៅលើបុរសជាអ្នកដឹកម្ហូបអាហារតាមអនឡាញម្នាក់ បណ្ដាលឲ្យរបួសហើយអ្នកប្រើហិង្សានោះបានគេចចេញទៅបាត់ ។
ហេតុការណ៍នេះបានកើតឡើងកាលពីម៉ោង១១យប់ថ្ងៃទី២៧ ខែឧសភា ឆ្នាំ២០២៥តាមបណ្ដោយផ្លូវជាតិលេខ១ ទល់មុខសាលាប៊ែលធីអន្តរជាតិ សង្កាត់វាលស្បូវ ខណ្ឌច្បារអំពៅ រាជធានីភ្នំពេញ។
ប្រភពពីបុរសជាអ្នកដឹកជញ្ជូនម្ហូបអាហារ E get បានអោយដឹងថា មុនពេលកេីតហេតុ គាត់បានដឹកម្ហូបអាហារអោយគេដោយជិះម៉ូតូហុងដាឌ្រីមតាមផ្លូវជាតិលេខ១ លុះមកដល់ចំណុចកេីតហេតុស្រាប់តែមានបុរស២នាក់ជិះម៉ូតូម៉ាកហុងដាPCX ពណ៌ស មិនចាំស្លាកលេខ បានជិះមកបុកគាត់ពីក្រោយបណ្តាលអោយដួលម៉ូតូរងរបួសតិចតួច ។
ប្រភពដដែលបានបន្តទៀតថា ដោយឃើញបែបនេះរូបគេបានចុះទៅជួយលើក ម៉ូតូPCX ដែលដួល ហើយស្រាប់តែពេលនោះមានបុរសម្នាក់ទៀតដែលជាជនដៃដល់បានជិះម៉ូតូផ្សេងទៀតមកពីក្រោយ មិនដឹងថាខឹងរឿងអ្វីនោះទេ បានទះគាត់មួយកំផ្លៀងរួចក្របួចអាវស្រែកគំរាមថាអ្ហែងស្គាល់អញជាអ្នកណាទេ។
ចំពោះករណីនេះផងដែរ ជនរងគ្រោះជាអ្នកដឹកជញ្ជូនម្ហូបអាហារបានរងរបួសតិចតួចត្រង់ភ្នែកខាងឆ្វេង ហើយបុរស២នាក់នោះក៏មិនដឹងថាជាកម្លាំងខាងណាអោយពិតប្រាកដដែរ ក្រោយធ្វើសកម្មភាពរួចនាំគ្នាជិះម៉ូតូចេញទៅបាត់អស់ទៅ ។
បន្ទាប់ពីកេីតហេតុ បុរសរងគ្រោះបានទៅដាក់ពាក្យបណ្ដឹងនៅប៉ុស្តិ៍ប៉ូលិសរដ្ឋបាល វាលស្បូវ ដេីម្បីអោយសមត្ថកិច្ចជួយស្រាវជ្រាវរកបុរសដែលប្រេីហិង្សាមកទទួលខុសត្រូវលើករណីនេះផងដែរ៕
ជ្រោយពេជ្រ
