ភ្នំពេញ ៖ លេខាធិការដ្ឋាន គ.ស.ព.ស. បានបញ្ជាក់ថា ៖ ការបង្ហោះវីដេអូដែលបង្ហាញពីមនុស្សមួយក្រុមប្រើអំពើហិង្សាវាយកម្ទេចសម្ភារៈរបស់ភាគីម្ខាងទៀត គឺជាព្រឹត្តិការណ៍កើតឡើងនៅក្រៅប្រទេស!
សូមបញ្ជាក់ថា ៖ នាព្រឹកថ្ងៃពុធ ទី២៨ ខែឧសភា ឆ្នាំ២០២៥ នេះ លេខាធិការដ្ឋាននៃគណៈកម្មាធិការជាតិសម្របសម្រួលកិច្ចការព័ត៌មាននិងសាធារណមតិ ហៅកាត់ថា គ.ស.ព.ស. បានចេញមកបញ្ជាក់ថា ការបង្ហោះវីដេអូ ដែលបង្ហាញពីមនុស្សមួយក្រុមប្រើអំពើហិង្សាវាយកម្ទេចសម្ភារៈរបស់ភាគីម្ខាងទៀត “មិនមែនជាព្រឹត្តិការណ៍នៅក្នុងប្រទេសកម្ពុជានោះទេ ប៉ុន្តែគឺជាករណីដែលបានកើតឡើងនៅប្រទេសដទៃប៉ុណ្ណោះ!”
គ.ស.ព.ស. បានសំណូមពរកុំឲ្យបងប្អូនប្រជាពលរដ្ឋមានការយល់ច្រឡំ និងបញ្ឈប់ការផ្សព្វផ្សាយ និងកុំបន្តចែករំលែកព័ត៌មាននេះតទៅទៀត។
គ.ស.ព.ស. បានសង្កត់ធ្ងន់ថា ការផលិត ឬចែកចាយព័ត៌មានក្លែងក្លាយ បង្កផលវិបាកឬព្យសនកម្មនានា និងត្រូវទទួលខុសត្រូវចំពោះមុខច្បាប់៕
ដោយ ៖ សិលា
