ខេត្តរតនគីរី÷ នៅព្រឹកថ្ងៃទី ២៩ ខែឧសភា ឆ្នាំ ២០២៥ នេះ លោក អឿង ចន្ថា អនុរដ្ឋលេខាធិការក្រសួងធនធានទឹក និងឧតុនិយម បានជូនដំណឹងថា ស្ថានភាពភ្លៀងខ្លាំង លាយឡំជាមួយផ្គរ រន្ទះ អាចបង្កទៅជាទឹកជំនន់យ៉ាងឆាប់រហ័ស ពិសេសនៅខេត្តរតនគីរី ត្រង់កន្ទុយជាប់នឹងប្រទេសវៀតណាមតែម្ដង។
យោងតាមការព្យាករណ៍អាកាសធាតុរបស់មន្ទីរធនធានទឹក និងឧតុនិយមខេត្តរតនគិរី បានឲ្យដឹងថា មានភ្លៀងធ្លាក់ ៧០ ភាគរយ ស្ថានភាពធាតុអាកាសខេត្តរតនគិរី ទទួលឥទ្ធិពលពីខ្យល់មូសុងនិរតី។ ចំណែកសីតុណ្ហភាព ២៣°C ទៅ ២៩ °C ខ្យល់បក់មកពីទិសនិរតី និងមានល្បឿន ១ ទៅ ៤ ម៉ែត្រ/ វិនាទី មានល្បឿនយ៉ាងឆាប់រហ័ស។ បរិយាកាសបែបនេះ ចាប់ពីថ្ងៃទី ២៩ ខែឧសភា ឆ្នាំ ២០២៥ ដល់ថ្ងៃ ៣១ ខែឧសភា ឆ្នាំ ២០២៥ មានរយៈពេល ៣ ថ្ងៃ ជាប់គ្នា។
ស្ថានភាពជាក់ស្ដែងនៅព្រឹកថ្ងៃទី 29 ខែឧសភា ឆ្នាំ ២០២៥នេះ មានពពកខ្មៅគ្របដណ្ដប់ផ្ទៃមេឃទាំងមូល មានភ្លៀងធ្លាក់តាំងពីព្រឹក រហូតដល់ល្ងាច ដោយពុំមានថ្ងៃរះនោះទេ។
មន្ទីរធនធានទឹក និងឧតុនិយមខេត្តរតនគិរី ក៏បានអំពាវនាវដល់ប្រជាពលរដ្ឋដែលរស់នៅតាមមាត់ទន្លេសេសាន និងទន្លេស្រែពក ត្រូវត្រៀមសម្ភារៈ មានទូក ខោអាវ ឯកសារសំខាន់ៗ រៀបចំឲ្យបានត្រឹមត្រូវ និងសុវត្ថិភាពខ្ពស់ ក្នុងករណីមានគ្រោះអាសន្នកើតឡើងដោយទឹកជំនន់។ ពិសេសជាងនេះទៅទៀតនោះ ប្រជាពលរដ្ឋដែលរស់នៅតំបន់កន្ទុយនាគ ខេត្តរតនគិរី នៃប្រទេសកម្ពុជា តែម្ដង៕
