ខេត្តព្រៃវែង៖ ទីបំផុតជនដៃដល់ដែលបានបាញ់ ប្រហារ លើគូស្នេហ៍ជាមនុស្សប្រុសដូចគ្នា បណ្ដាលឱ្យរបួសធ្ងន់នៅស្រុកស្វាយអន្ទរ បានស្លាប់ហើយ បន្ទាប់ពីរត់គេចខ្លួន និងចងក.នៅប្រទេសថៃ។ នេះបើយោងតាមការបញ្ជាក់ពីសមត្ថកិច្ច។
គួរបញ្ជាក់ថា ករណីបាញ់ប្រហារមួយបានកើតឡើងនៅវេលាម៉ោង ៩និង ៣៥នាទីយប់ ថ្ងៃទី១ មិថុនា ឆ្នាំម២០២៥ នៅលើផ្ទះជនរងគ្រោះ ដែលស្ថិតនៅក្នុងភូមិព្រៃភ្លាំង ឃុំដំរីពួន ស្រុកស្វាយអន្ទរ ខេត្តព្រៃវែង។
ជនរងគ្រោះឈ្មោះ ហួរ ឡុង ភេទប្រុស អាយុ៣៩ឆ្នាំ មានទីលំនៅក្នុងភូមិឃុំកើតហេតុ ហើយជនបង្កដែលជាគូស្នេហ៍ឈ្មោះ ឃុន ហ៊ុយ ភេទប្រុស អាយុ៣៩ឆ្នាំ មានទីលំនៅក្នុងស្រុកមោងឬស្សី ខេត្តបាត់ដំបង(ស្លាប់)។
បើតាមប្រភព ក្រោយកើតហេតុ សមត្ថកិច្ច បានតាមស្វែងរកចាប់ខ្លួនជនបង្ករហូតដល់ថ្ងៃទី០៤ ខែមិថុនា ឆ្នាំ ២០២៥ ស្រាប់តែមានដំណឹងមកថា ជនបង្កឈ្មោះ ឃុន ហ៊ុយ បានចងក សម្លាប់ខ្លួននៅប្រទេសថៃស្លាប់បាត់ទៅហើយ ។
បន្ទាប់ពីទទួលដំណឹងនេះសមត្ថកិច្ចជំនាញបានបន្តស្រាវជ្រាវនិងពិនិត្យឃើញថា ឈ្មោះ ឃុន ហ៊ុយ ពិតជាបានចងកសម្លាប់ខ្លួនប្រាកដមែន។
មន្ត្រីនគរបាលស្រុកស្វាយអន្ទរ បានឲ្យដឹងថា ដើមចមដំបូង ជនរងគ្រោះឈ្មោះ ហួរ ឡុង ធ្លាប់មានប្រពន្ធ នៅស្រុកកំណើតរួចហើយ។ ប៉ុន្តែបានឈ្លោះបាក់បែកគ្នា ហើយរូបគេក៏ចេញទៅរកស៊ីនៅក្រុងប៉ោយប៉ែត ដោយបានជួបនិងស្រឡាញ់គ្នា ជាមួយជនបង្កឈ្មោះ ឃុន ហ៊ុយ ហើយបានរកស៊ីនិងរួមរស់ជាមួយគ្នានៅទីនោះ។
ប៉ុន្តែនៅថ្ងៃទី២៨ ខែឧសភា ឆ្នាំ២០២៥ គូស្នេហ៍ប្រុសនិងប្រុសមួយគូនេះ បានឈ្លោះប្រកែកគ្នា ហើយជនរងគ្រោះ ហួរ ឡុង បានត្រឡប់មកផ្ទះនៅស្រុកកំណើតឯស្រុកស្វាយអន្ទរ ខេត្តព្រៃវែង ហើយបានត្រូវគ្នាជាមួយប្រពន្ធវិញ ចំណែកជនបង្កឈ្មោះ ឃុន ហ៊ុយ ដែលជាគូស្នេហ៍ បានព្យាយាមទាក់ទងហៅជនរងគ្រោះឲ្យត្រឡប់ទៅវិញជាច្រើនដង ។
តែជនរងគ្រោះមិនព្រមទៅ ទើបនៅយប់ថ្ងៃទី១មិថុនា ជនបង្កបានបើករថយន្តតាមមកដល់ផ្ទះនិងបាញ់សំដៅទៅលើជនរងគ្រោះ ដែលកំពុងដេកលើផ្ទះ ត្រូវ១គ្រាប់ចំថ្ពាល់ខាងស្ដាំ ធ្លុះទៅគុម្ពត្រចៀករងរបួសធ្ងន់ រួចជនបង្កបានរត់គេចខ្លួនបាត់។
ក្រោយកើតហេតុភ្លាមៗ ជនរងគ្រោះត្រូវបានក្រុមគ្រួសារ នាំយកទៅសង្គ្រោះនៅឯរាជធានីភ្នំពេញភ្លាមៗ នឹងបានដាក់ពាក្យប្ដឹងទៅសមត្ថកិច្ច ឲ្យតាមចាប់ខ្លួនជនបង្ក លុះឥឡូវជនបង្កបានសម្លាប់ខ្លួនឯង៕
