ខេត្តកណ្ដាល៖ កម្លាំងកងរាជអាវុធហត្ថក្រុងតាខ្មៅ សហការជាមួយកម្លាំងស្រុកស្អាង បង្ក្រាបករណីជួញដូរ រក្សាទុក និងប្រើប្រាស់សារធាតុញៀន (ម៉ាទឹកកក) ដោយខុសច្បាប់ កាលពីវេលាម៉ោង ១៨និង៣០នាទី ថ្ងៃទី៣០ ខែមិថុនា ឆ្នាំ២០២៥ នៅចំណុចភូមិព្រែកខ្សេវ សង្កាត់រកាខ្ពស់ ក្រុងតាខ្មៅ ខេត្តកណ្ដាល។

ជនសង្ស័យចំនួន ២នាក់ត្រូវបានឃាត់ខ្លួន រួមមាន៖ ឈ្មោះ ម៉ៅ ទីភេទប្រុសអាយុ២០ឆ្នាំមុខរបរកម្មកររោង ចក្រ មានទីលំនៅបច្ចុប្បន្នភូមិពាមសាលា ឃុំស្អាងភ្នំ ស្រុកស្អាង ខេត្តកណ្ដាល (មានសារធាតុញៀន) និងឈ្មោះ ហ៊ន សុខហេងភេទប្រុសអាយុ៣០ឆ្នាំ មុខរបរធ្វើជាងតុទូ មានទីលំនៅបច្ចុប្បន្នភូមិពាមសាលា ឃុំស្អាងភ្នំ ស្រុកស្អាង ខេត្តកណ្ដាល (មានសារធាតុញៀន)។ ចំណែកវត្ថុតាងចាប់យកបានរួមមាន ថ្នាំក្រាមសថ្លា (ម៉ាទឹកកក) ចំនួន ២កញ្ចប់ (ធំ ១កញ្ចប់ និងតូច ១កញ្ចប់) និងទូរសព្ទ ១គ្រឿង ម៉ាក OPPO ពណ៌ខ្មៅ។

យោងតាមព័ត៌មានពីប្រជាពលរដ្ឋអំពីសកម្មភាពចែក ចាយសារធាតុញៀនយ៉ាងសកម្ម កម្លាំងកងរាជអាវុធ ហត្ថក្រុងតាខ្មៅ ៨នាក់ រួមជាមួយរថយន្ត ១គ្រឿង និងម៉ូតូ ២គ្រឿង ដឹកនាំដោយមេបញ្ជាការកងរាជអាវុធហត្ថក្រុងតាខ្មៅ រួមនឹងកម្លាំងស្រុកស្អាង ៤នាក់ ដឹកនាំដោយមេបញ្ជាការស្រុក បានចុះស្រាវជ្រាវ និងឃាត់ខ្លួនជនសង្ស័យទាំង ២នាក់ រួមនឹងវត្ថុតាងខាងលើ។

តាមចម្លើយសារភាពរបស់ជនសង្ស័យទាំងពីរនាក់ ថ្នាំញៀនដែលខ្លួនយកមក គឺត្រូវបានឈ្មោះ ភន ចន្នី (ប្រុស, ៣២ឆ្នាំ) មានទីលំនៅភូមិលេខ៤ សង្កាត់ស្វាយរលំ ក្រុងតាខ្មៅ ជាអ្នកឲ្យពួកគេយកមកឲ្យគេនៅចំណុចភូមិព្រែកខ្សេវ ជាប់ព្រំប្រទល់ស្រុកស្អាង។

បច្ចុប្បន្ន ជនសង្ស័យ និងវត្ថុតាងកំពុងអនុវត្តតាមនីតិវិធីច្បាប់៕