ខេត្តត្បូងឃ្មុំ ៖ មានករណីភ្ញាក់ផ្អើលប្រជាពលរដ្ឋដើរទៅរកត្រីនៅចំណុចរណ្ដៅដី១កន្លែងមានទឹកជ្រៅ ហើយធុំក្លិនស្អុយខុសពីធម្មតា លុះរកមើលទើបដឹងថា មានសពមនុស្សម្នាក់ត្រូវបានគេកប់នៅចំណុចក្បែររណ្តៅដី ខាង លិចវត្តសមា្មធិ ភូមិបុសល្វេ ឃុំក្រែក ស្រុកពញាក្រែក ខេត្តត្បូងឃ្មុំ បង្កការភ្ញាក់ផ្អើលកាលពីវេលាម៉ោង១០និង៤០នាទីថ្ងៃទី៣ កក្កដា ឆ្នាំ២០២៥ ហើយរហូតមកដល់រសៀលថ្ងៃទី៤ កក្កដា ឆ្នាំ២០២៥ គេនៅមិនទាន់ស្គាល់អត្តសញ្ញាណសាកសពនោះនៅឡើយទេ។
ប្រភពព័ត៌មានបានឱ្យដឹងថា មុនពេលកើតហេតុ មានអ្នកភូមិម្នាក់បានដើរទៅរកត្រីនៅចំណុចរណ្ដៅដី១ កន្លែងក៏ធុំក្លិនស្អុយ លុះរកមើល ស្រាប់តែប្រទះឃើញសាកសពមនុស្សប្រុស១នាក់មិនស្គាល់អត្តសញ្ញាណត្រូវគេកប់នៅចំណុចកើតហេតុខាងលើ រួចរាយការណ៍ប្រាប់សមត្ថកិច្ចនគរបាលប៉ុស្តិ៍ ដើម្បីឱ្យចុះមកពិនិត្យនៅកន្លែងកើតហេតុ ។
សមត្ថកិច្ចបានឲ្យដឹងថា ក្រោយពីទទួលបានព័ត៌មានខាងលើនេះភ្លាម កម្លាំងប៉ុស្តិ៍រដ្ឋបាលមូលដ្ឋានព្រមទាំងលោកអធិការនគរបាលស្រុកពញាក្រែកសហការជាមួយមន្ត្រីជំនាញ ចុះទៅកន្លែងកើតហេតុ និងយកខ្សែឡោម ព័ទ្ធទីតាំងកើតហេតុ ដើម្បីការពារកុំឱ្យប្រជាពលរដ្ឋដើរឆ្លងកាត់ អាចធ្វើឲ្យពិបាកក្នុងការតាមដានរកភស្តុតាងនានា។
គ្រូពេទ្យកោសល្យវិច្ច័យនិងដោយមានការដឹកនាំសម្រប សម្រួលនីតិវិធីដោយលោកសូ សុវិទ្យា ព្រះរាជអាជ្ញារងអមសាលាដំបូងខេត្តត្បូងឃ្មុំ ចុះទៅដល់ទីតាំងកន្លែងកើតហេតុធ្វើការពិនិត្យសពជនរងគ្រោះ ។ ជាលទ្ធផលនៃការពិនិត្យស្រាវជ្រាវលើសាកសព បានបញ្ជាក់ថា សពជនរងគ្រោះមានសភាពស្អុយរលួយ និងស្លាប់ប្រហែល៧ថ្ងៃកន្លងមកហើយ ។ ពិនិត្យលើអវៈយវៈដៃទាំងសងខាងនិងជើងទាំងសងខាងមានស្លាកស្នាមជាំ និងបាក់ក សង្ស័យជាករណីឃាតកម្ម ។ តាមការពិនិត្យលើភិនភាគសាកសពជនរងគ្រោះអាចជាជនជាតិចិន មានអាយុប្រហែល៣៤ឆ្នាំ។
បើតាមកម្លាំងសមត្ថកិច្ចបានបញ្ជាក់ថា សូម្បីតែលិង្គរបស់សាកសពជនរងគ្រោះ ក៏ត្រូវបានគេកាត់ដាច់បាត់ ហើយមិនដឹងថាតើមានការពាក់ព័ន្ធទៅនឹងករណីអ្វីបានជាក្រុមឃាតករ ទើបជនរងគ្រោះត្រូវគេសម្លាប់ ដោយ មានភាពសាហាវយ៉ាងដូច្នេះ ។
បច្ចុប្បន្ន សពជនរងគ្រោះ ត្រូវបានសមត្ថកិច្ចបង្កើតគណៈកម្មការ ដើម្បីកប់សព នៅបរិវេណមុខវត្តសមាធិ ក្នុងភូមិបុសល្វេ ឃុំក្រែក ស្រុកពញាក្រែក ខេត្តត្បូងឃ្មុំ។
សមត្ថកិច្ចជំនាញនៃស្នងការដ្ឋាននគរបាលខេត្តត្បូងឃ្មុំសហការជាមួយកំលាំងជំនាញនៃអធិការដ្ឋាននគរបាលស្រុកពញាក្រែកបន្តធ្វើការស្រាវ គិតរហូតមកដល់រសៀលថ្ងៃទី ៤ កក្កដា សពនោះនៅតែមិនទាន់ស្គាល់អត្តសញ្ញាណនៅឡើយ ៕
