ក្រុមជួយសង្គ្រោះឥណ្ឌាបានថ្លែងថា យ៉ាងហោចណាស់មនុស្ស១១នាក់បានបាត់បង់ជីវិត កាលពីថ្ងៃទី៤ ខែសីហាឆ្នាំ២០១៥ បន្ទាប់ពីហេតុការណ៍បាក់រលំអគារមួយកន្លែងស្ថិតនៅមិនឆ្ងាយប៉ុន្មានពីទីក្រុងម៉ុមបៃ ។ នេះជាហេតុការណ៍ទី២ហើយគិតក្នុងរយៈពេលមួយសប្តាហ៍ដែលមានការបាក់រលំអគារនៅរដ្ឋធានីពាណិជ្ជកម្មរបស់ឥណ្ឌា ។
មន្ត្រីបានបញ្ជាក់ថា ជនរងគ្រោះបាននិងកំពុងដេកលងលក់កាលពីយប់ថ្ងៃទី៣ ខែសីហា ហើយស្រាប់តែមានហេតុការណ៍បាក់រលំអគារកម្ពស់៣ជាន់នេះតែម្តង ។ ក្រុមជួយសង្គ្រោះបានឆ្ពោះទៅកាន់កន្លែងកើតហេតុភ្លាមៗ ដើម្បីសង្គ្រោះជនរងគ្រោះដែលកប់នៅក្រោមគំនរបាក់បែក ។
លោក Alok Avasthy មន្ត្រីរបស់កងកម្លាំងជួយសង្គ្រោះគ្រោះមហន្តរាយជាតិបានបញ្ជាក់ប្រាប់ AFP ថា សាកសព១១នាក់ត្រូវបានរកឃើញ និង៧នាក់ផ្សេងទៀត មានសំណាង គឺនៅរស់រានមានជីវិត ។ ជាមួយគ្នានេះ ជនរងគ្រោះម្នាក់ទៀតនៅបាត់ខ្លួន ។ អគារនេះមានទីតាំងស្ថិតនៅតំបន់ Naupada ទីក្រុង Thane ជិតទីក្រុងម៉ុមបៃ ។
លោក Avasthy បានបញ្ជាក់ថា អគារនេះមានអាយុកាលជាង៥០ឆ្នាំកន្លងមកហើយ ជាអគារចាស់ទ្រុឌទ្រោម ដែលត្រូវរដ្ឋាភិបាលប្រកាសមិនឲ្យពលរដ្ឋទៅរស់នៅទីនោះឡើយកាលពី២ឆ្នាំមកម្ល៉េះ ប៉ុន្តែពលរដ្ឋនៅតែទៅរស់នៅទីនោះ មិនស្តាប់តាមការព្រមានរបស់រដ្ឋាភិបាល ។
លោកបន្តថា ក្រុមជួយសង្គ្រោះដោយមានសត្វសុនខជួយហិតក្លិនផងបានរកឃើញគ្រួសារមួយមានគ្នា៥នាក់ នៅរស់រានមានជីវិត គេចផុតពីសេចក្តីស្លាប់ ។
គ្រោះថ្នាក់ស្តីពីការបាក់អគារនៅក្នុងប្រទេសឥណ្ឌា ជានិច្ចកាលបានកើតឡើងជាបន្តបន្ទាប់ ។ គេបានបញ្ជាក់ថា មូលហេតុភាគច្រើនបណ្តាលឲ្យការសាងសង់អគារខ្វះលក្ខណៈបច្ចេកទេស ។ សូមបញ្ជាក់ថា កាលពីសប្តាហ៍កន្លងនេះ មនុស្ស៩នាក់បានបាត់បង់ជីវិត ក្រោយការបាក់រលំអគារកម្ពស់៣ជាន់ ដោយសារតែភ្លៀងធ្លាក់ខ្លាំងក្នុងរដូវវស្សា ស្ថិតនៅជាយក្រុងម៉ុមបៃ តំបន់ Thakurli ។
ពលរដ្ឋឥណ្ឌារាប់លាននាក់រស់នៅក្នុងអគារចាស់ៗទ្រុឌទ្រោម ដែលមើលទៅគួរឲ្យភ័យព្រួយបំផុត ជាពិសេសនៅរដូវភ្លៀងធ្លាក់នេះ ។ អគារកម្ពស់១១ជាន់ដែលសាងសង់ឡើងនៅភាគខាងត្បូងរដ្ឋ Tamil Nadu នោះបានបាក់កាលពីខែកក្កដា ឆ្នាំ២០១៤ បន្ទាប់ពីមានភ្លៀងធ្លាក់ខ្លាំង បណ្តាលឲ្យស្លាប់មនុស្ស៦១នាក់ ភាគច្រើនជាពលករ ៕
