ភ្នំពេញ ៖ កម្លាំងនគរបាលរាជធានីភ្នំពេញ ឃាត់អនុប្រធានប្រតិបត្តិខណ្ឌពោធិ៍សែនជ័យ គណបក្សកម្លាំងជាតិ តាមដីការបស់តុលាការ ក្រោយប្រមាថអង្គព្រះមហាក្សត្រយ៉ាងធ្ងន់ធ្ងរ។ នេះបើយោងតាម សេចក្តីប្រកាសព័ត៌មានរបស់ស្នងការដ្ឋាននគរបាលរាជធានីភ្នំពេញ ករណីឃាត់ខ្លួនជនសង្ស័យឈ្មោះ អៀម រ៉ាវុទ្ធ អនុប្រធានប្រតិបត្តិខណ្ឌពោធិ៍សែនជ័យ គណបក្សកម្លាំងជាតិ ។

អ្នកនាំពាក្យ នៃស្នងការដ្ឋាននគរបាលរាជធានីភ្នំពេញ សូមជម្រាបជូនសាធារណជនឱ្យ បានជ្រាបថា: នៅថ្ងៃទី១៥ ខែសីហា ឆ្នាំ២០២៥ វេលាម៉ោង២២:២០នាទី សមត្ថកិច្ចជំនាញ នៃស្នងការដ្ឋាន នគរបាលរាជធានីភ្នំពេញ បានធ្វើការឃាត់ខ្លួនជនសង្ស័យឈ្មោះ អៀម រ៉ាវុទ្ធ ភេទប្រុស អាយុ៣៩ឆ្នាំ មុខរបរ អនុប្រធានប្រតិបត្តិខណ្ឌពោធិ៍សែនជ័យ គណបក្សកម្លាំងជាតិ តាមដីកាបង្គាប់ឱ្យចាប់ខ្លួនលេខ ១០៧៣ “រ” ដ.ច.ន ចុះថ្ងៃទី១៥ ខែសីហា ឆ្នាំ២០២៥ របស់លោក លី សុខា ចៅក្រមស៊ើបសួរសាលាដំបូងរាជធានីភ្នំពេញ នៅចំណុច ភូមិព្រៃព្រីង សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ពីបទប្រមាថចំពោះអង្គព្រះមហាក្សត្រ។

ជនសង្ស័យបន្ទាប់មកត្រូវបានបញ្ជូនមកកាន់ ស្នងការដ្ឋាននគរបាលរាជធានីភ្នំពេញ ដើម្បីធ្វើការសាកសួរ និងបន្តនីតិវិធី។ ដោយយោងតាមចម្លើយសារភាព និងប្រមូលបានភស្តុតាង ជនសង្ស័យពិតជាបានប្រើប្រាស់ បណ្តាញសង្គម ប្រព្រឹត្តសកម្មភាពសរសេរខ្លឹមសារប្រមាថចំពោះអង្គព្រះមហាក្សត្រ ផ្ទុយនឹងច្បាប់រដ្ឋធម្មនុញ្ញ នៃព្រះរាជាណាចក្រកម្ពុជា បង្កឱ្យប៉ះពាល់ដល់ព្រះកិត្តិយសព្រះមហាក្សត្រយ៉ាងធ្ងន់ធ្ងរ។ ការឃាត់ខ្លួនជនសង្ស័យ សមត្ថកិច្ចអនុវត្តអង្គហេតុ និងអង្គច្បាប់នៃការប្រព្រឹត្តបទល្មើសដែលមានចែងក្នុងក្រមព្រហ្មទណ្ឌ និងសូមច្រានចោល ទាំងស្រុងចំពោះការផ្សព្វផ្សាយរបស់គណបក្សកម្លាំងជាតិ ដែលចោទថាការឃាត់ខ្លួនជនសង្ស័យឈ្មោះ អៀម រ៉ាវុទ្ធ ជាការគំរាមកំហែងផ្នែកនយោបាយ ដោយការចោទប្រកាន់នេះមិនផ្អែកលើអង្គហេតុ និងអង្គច្បាប់ឱ្យបានត្រឹម ត្រូវនោះឡើយ។

សូមអំពាវនាវឱ្យសាធារណជនត្រូវប្រើប្រាស់ព័ត៌មានដោយមានការត្រួតពិនិត្យប្រភពច្បាស់លាស់ និង ចៀសវាងការចែកចាយ ឬការបញ្ចេញមតិ តាមរយៈព័ត៌មានមិនពិត ដែលអាចប៉ះពាល់ដល់សន្តិសុខសង្គម និងប៉ះពាល់ សិទ្ធិស្របច្បាប់របស់អ្នកដទៃ។ 

បច្ចុប្បន្នសមត្ថកិច្ចជំនាញ បានកសាងសំណុំរឿងដើម្បីចាត់ការតាមនីតិវិធី បញ្ជូនជនសង្ស័យទៅតុលាការ

អាស្រ័យដូចបានជម្រាបជូនខ្លឹមសារខាងលើសូមសាធារណជនមេត្តាជ្រាបជាព័ត៌មាន៕

ដោយ ៖ សិលា