ខេត្តបាត់ដំបង÷ ពីថ្ងៃទី២១ខែសីហាឆ្នាំ២០២៥ ស្របតាមអនុសាសន៍នាយឧត្តមសេនីយ៍ ស ថេត អគ្គស្នងការនគរបាលជាតិ និងតាមការចង្អុលដឹកនាំរបស់លោកឧត្តមសេនីយ៍ទោ ដាញ់ អេងប៊ុនចាន់ ស្នងការនៃស្នងការដ្ឋាននគរបាលខេត្តបាត់ដំបង លោកវរសេនីយ៍ឯក សុខ និមល ស្នងការរងផែនការងារប្រឆាំងគ្រឿងញៀន ដឹកនាំកម្លាំងក្នុងផែនឆ្មក់បង្រ្កាបនិងចាប់ខ្លួនពិរុទ្ធជនឈ្មោះ សេក វិទូ ភេទប្រុស អាយុ៤១ឆ្នាំ រស់នៅភូមិតាព្រួច សង្កាត់ក្តុលដូនទាវ ក្រុងនិងខេត្តបាត់ដំបង ខណៈដែលរូបគេលបលួចចូលមកក្នុងមូលដ្ឋានពេលយប់។
សេក វិទូ គឺជាមុខសញ្ញាជួញដូរគ្រឿងញៀនយ៉ាងសកម្មនៅក្នុងមូលដ្ឋានក្រុងបាត់ដំបងនាពេលកន្លងមក ដែលរូបគេមានដីកាចាប់ខ្លួនរបស់តុលាការចំនួន០៥ដីកា ពីឆ្នាំ២០២៣រហូតដល់ឆ្នាំ២០២៥ តែកន្លងទៅតាមចាប់មិនបាន។
តាមការបញ្ជាក់របស់មន្រ្តីអ្នកអនុវត្តជំនាញនេះផ្ទាល់បានឱ្យដឹងថា មុខសញ្ញាដ៏សកម្មមួយនេះ តែងគេចផុតពីប្រតិបត្តិការរបស់សមត្ថកិច្ចជាបន្តបន្ទាប់នាពេលកន្លងមក ពោលគេចល័តចេញចូលក្នុងមូលដ្ឋានដោយស្ងៀមស្ងាត់និងពេលយប់តែបុណ្ណោះ ឬក៏បាត់មុខរយៈពេលវែងពីមូលដ្ឋាន ដែលជាហេតុបង្កឱ្យគេមានឱកាសប្រព្រឹត្តសកម្មភាពល្មេីសជាបន្តបន្ទាប់បាន តែពេលនេះត្រូវបានជាប់អន្ទាក់សមត្ថកិច្ចដោយពុំអាចរួចខ្លួនបានទៀតឡេីយ។
ក្នុងកិច្ចប្រជុំបូកសរុបលទ្ធផលការងារប្រចាំខែកាលពីថ្ងៃទី១៩ ខែសីហា ឆ្នាំ២០២៥ កន្លងមកលោកឧត្តមសេនីយ៍ទោ ដាញ់ អេងប៊ុនចាន់ បានដាក់ជាវិធានការសំខាន់ដល់មន្រ្តីក្រោមឱវាទត្រូវស្រាវជ្រាវនិងចាត់ការស្វែងរកចាប់ខ្លួនជនល្មេីសដែលមានក្នុងដីកាឱ្យបានទោះជារូបគេគេចខ្លួនទៅដល់ទីណាក៏ដោយ៕
