ភ្នំពេញ៖ លោក នង សាកល អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ បានថ្លែងថា ភាគីថៃ នៅតែព្រងើយកន្តើយមិនព្រមដោះលែងកងកម្លាំងកម្ពុជាមកវិញនោះទេ បើទោះបីជាមានកិច្ចអន្តរាគមន៍ពី សហគមន៍អន្តរជាតិ ក៏ដូចជាប្រធានអាស៊ានយ៉ាងណាក៏ដោយនោះ។ នេះបើគិតមកដល់ថ្ងៃនេះ គឺមានរយៈពេល២៥ថ្ងៃហើយ ដែលទាហានថៃបានចាប់ខ្លួនកងកម្លាំងកម្ពុជាដោយខុសច្បាប់ក្រោយបទឈប់បាញ់ចូលជាធរមានភ្លាមៗកាលពីព្រឹកថ្ងៃទី២៩ ខែកក្កដា ឆ្នាំ២០២៥កន្លងទៅ។
ថ្លែងនៅក្នុងសន្និសីទសារព័ត៌មានប្រចាំថ្ងៃ ស្តីពីការអនុវត្តបទឈប់បាញ់ នាព្រឹកថ្ងៃទី២៣ ខែសីហា ឆ្នាំ២០២៥នេះ លោក នង សាកល អ្នកនាំពាក្យក្រសួងការបរទេស បានគូសបញ្ជាក់ថា កម្ពុជាបានជូនដំណឹងទៅសហរដ្ឋអាមេរិក អង្គការសហប្រជាជាតិ ឧត្តមក្រុមប្រឹក្សាសន្តិសុខអង្គការសហប្រជាតិ កាកបាទក្រហមអន្តរជាតិ សហគមន៍អាស៊ាន រួមទំាងបណ្តាប្រទេសជាមិត្តជាច្រើនទៀតទាក់ទងនឹងថៃ ដែលបានចាប់ទាហានកម្ពុជា ១៨នាក់ដោយខុសច្បាប់ ខណៈកំពុងអនុវត្តកិច្ចព្រមព្រៀងបទឈប់បាញ់ ហើយរហូតមកដល់ពេលនេះថៃនៅតែមិនព្រមដោះលែងពួកគាត់ទាំង ១៨នាក់មាតុភូមិនិវត្តវិញនោះទេ ប៉ុន្តែទោះជាយ៉ាងណាក៏ដោយកម្ពុជា ក៏ដូចជាសហគមន៍អន្តរជាតិនៅតែបន្តទាមទាររហូតដល់ថៃបំពេញនូវកតព្វកិច្ចរបស់ខ្លួន ដោយត្រូវធ្វើការដោះលែងទាហានខ្មែរទាំង១៨នាក់មកកម្ពុជា វិញឲ្យបានឆាប់ និងស្របទៅតាមការទាមទាររបស់សហគមន៍អន្តរជាតិ។
ទាក់ទងនឹងទាហានកម្ពុជាទាំង១៨នាក់ដែលថៃចាប់ទៅដោយខុសច្បាប់នេះដែរ លោកស្រី ឧត្តមសេនីយ៍ឯក ម៉ាលី សុជាតា អនុរដ្ឋលេខាធិការ និងជាអ្នកនាំពាក្យក្រសួងការពារជាតិកម្ពុជា ក៏បានបន្តអំពាវនាវយ៉ាងទទួចឲ្យថៃប្រគល់ពួកគាត់មកកម្ពុជាវិញឲ្យបានឆាប់ស្របទៅតាមច្បាប់មនុស្សធម៌អន្តរជាតិ ខណៈក្រុមគ្រួសាររបស់ជនរងគ្រោះកំពុងទទឹងរង់ចាំទាំងយប់ទាំងថ្ងៃនោះ។
ជាថ្មីម្តងទៀត លោកស្រីឧត្តមសេនីយ៍ឯក ម៉ាលី សុជាតា បានបញ្ជាក់ថា ក្រសួងការពារជាតិនិងកងយោធពលខេមរភូមិន្ទមិនបានព្រងើយកន្តើយ ឬទុកសមាជិករបស់ខ្លួនណាមួយចោលនោះទេទោះក្នុងកាលៈទេសៈណាក៏ដោយ ខណៈរាជរដ្ឋាភិបាលកម្ពុជាក៏ដូចជាសហគមន៍អន្តរជាតិ បានកំពុងធ្វើការយ៉ាងយកចិត្តទុកដាក់ និងស្រស្រាក់ស្រស្រាំបំផុត ដើម្បីធ្វើយ៉ាងណាជំរុញឲ្យភាគីថៃដោះលែងពួកគេមកកម្ពុជាវិញឲ្យបានឆាប់ៗ។
បន្ថែមពីនេះ លោកស្រីអ្នកនាំពាក្យ បានបញ្ជាក់សារជាថ្មីម្តងទៀតថា កម្ពុជាក៏ដូចជាសហគមន៍អន្តរជាតិនៅតែបន្តអំពាវនាវឲ្យថៃបំពេញនូវកតព្វកិច្ចរបស់ខ្លួន ពោលគឺរហូតដល់ថៃធ្វើការដោះលែងទាហានកម្ពុជាទាំង១៨នាក់នោះឲ្យខាងតែបាននាពេលឆាប់ៗនេះ៕
ដោយ៖តារា
