ខេត្តកំពង់ចាម÷ អនុវត្តតាមអនុសាសន៍របស់នាយឧត្តមសេនីយ៍ ស ថេត អគ្គស្នងការនគរបាលជាតិ ឱ្យមានការយកចិត្តទុកដាក់ខ្ពស់ពីទុក្ខលំបាករបស់ប្រជាពលរដ្ឋនៅក្នុងមូលដ្ឋាន នៅវេលាម៉ោង១៩និង២០នាទី ថ្ងៃទី០១ ខែកញ្ញា ឆ្នាំ២០២៥ វេនប្រចាំបញ្ជានៃស្នងការដ្ឋាននគរបាលខេត្តកំពង់ចាម បានទទួលព័ត៌មានថា មានករណីអគ្គិភ័យបានឆាបឆេះអគារស្នាក់នៅរបស់បុគ្គលិកភោជនីយដ្ឋានវីអេក នៅតាមផ្លូវជាតិលេខ៧ ស្ថិតក្នុងភូមិបឹងស្នាយ សង្កាត់សំបួរមាស ក្រុងកំពង់ចាម ។

ទទួលបានព័ត៌មានភ្លាម លោកឧត្តមសេនីយ៍ទោ ហេង វុទ្ធី ស្នងការនគរបាលខេត្តកំពង់ចាម បានដឹកនាំកម្លាំងដោយផ្ទាល់និងបញ្ជាឱ្យកម្លាំងជំនាញយករថយន្តពន្លត់អគ្គិភ័យ ចំនួន៥គ្រឿងចេញជួយអន្តរាគមន៍សង្គ្រោះជាបន្ទាន់ ។

កងកម្លាំងនគរបាលសហការជាមួយសមត្ថកិច្ចពាក់ព័ន្ធជួយអន្តរាគមន៍សង្រ្គោះ និងគ្រប់គ្រងស្ថានការណ៍បាន១០០ភាគរយ មិនបណ្ដោយឱ្យភ្លើងឆាបឆេះរីករាលដាលបន្តទៀត នៅវេលាម៉ោង ២១និង៥០នាទី ដោយប្រើប្រាស់រថយន្តពន្លត់អគ្គិភ័យចំនួន៥គ្រឿង និងអស់ទឹកចំនួន ២១សុឺទែន ។

គួរបញ្ជាក់ថា អគ្គិភ័យឆាបឆេះនេះ បណ្ដាលមកពីការឆ្លងចរន្តអគ្គិសនីធ្វើឱ្យខូចខាតអគារស្នាក់នៅរបស់បុគ្គលិកភោជនីយដ្ឋានវីអេក១ខ្នង តែពុំមានប៉ះពាល់ដល់អាយុជីវិតមនុស្ស និងសត្វពាហនៈឡើយ ។ បច្ចុប្បន្នជំនាញកំពុងសិក្សាវាយតម្លៃ អំពីទំហំនៃការខូចខាតលម្អិត ។

ស្នងការដ្ឋាននគរបាលខេត្តកំពង់ចាមសូមអំពាវនាវដល់បងប្អូនប្រជាពលរដ្ឋទាំងអស់ សូមមានការប្រុងប្រយ័ត្នខ្ពស់បំផុតក្នុងការពិនិត្យមើលឡើងវិញចំពោះ ការរៀបចំបណ្ដាញអគ្គិសនីនៅតាមផ្ទះ តាមអគារ ភោជនីយដ្ឋាន និងនៅបន្ទប់ស្នាក់នៅជាដើម ត្រូវរៀបចំតាមលក្ខណៈបច្ចេកទេសក្បួនខ្នាតឱ្យបានត្រឹមត្រូវ ចៀសវាងកុំឱ្យកើតឡើងនូវហានិភ័យណាមួយជាយថាហេតុ ៕