ខេត្តបាត់ដំបង៖ លោកឧត្តមសេនីយ៍ទោ ដាញ់ អេងប៊ុនចាន់ ស្នងការនគរបាលខេត្តបាត់ដំបង បានឱ្យដឹងនៅថ្ងៃអាទិត្យទី០៧ ខែកញ្ញា ឆ្នាំ២០២៥នេះថា លោកវរសេនីយ៍ទោ ហេង បារាំង អធិការនគរបាលស្រុកបាណន់ ដឹកនាំធ្វេីការស្រាវជ្រាវរហូតឃាត់ខ្លួនជនបង្កឈ្មោះ ជួប វិទូ ភេទប្រុស អាយុ២៨ឆ្នាំ មានទីលំនៅភូមិក្រពើជើង ឃុំភ្នំសំពៅ ស្រុកបាណន់ ខេត្តបាត់ដំបង យកមកធ្វើការសាកសួរនៅអធិការដ្ឋានកាលពីថ្ងៃទី០៦ខែ កញ្ញា ឆ្នាំ២០២៥ ។ បន្ទាប់ពីរូបគេបានបង្កហិង្សាដោយប្រេីប្រាស់ដំបងដែកវាយ ទៅលេីជនរងគ្រោះឈ្មោះ ហេង ដារ៉ាវង្ស ភេទប្រុស អាយុ ឆ្នាំរស់នៅមូលដ្ឋានខាងលេី កាលពីថ្ងៃទី០៤ ខែ កញ្ញា ឆ្នាំ២០២៥ ឱ្យរងរបួស ។
បើតាមមន្រ្តីនគរបាលស្រុកបាណន់ បានឱ្យដឹងថា រឿងដែលផ្តេីមឱ្យកេីតករណី ហិង្សានេះគឺជនបង្កមានទំនាស់ពាក្យសម្ដីជាមួយឈ្មោះ ហេង ដារ៉ាវង្ស ភេទប្រុស អាយុ២០ឆ្នាំ ដោយថាឈ្មោះ ហេង ដារ៉ាវង្សប្រេីពាក្យសម្តីមិនគោរពខ្លួននិងហាក់មេីលងាយអ្នកដទៃ(ជាជនពិការ) ថែមទៀតផង ។
មិនតែប៉ុណ្ណោះ លឺថាឈ្មោះ ហេង ដារាវង្ស បបួលកាប់គ្នា ថែមទៀត ដែលតាមប្រភពនេះជនបង្កបបួលគ្នាឡើងវាយគ្នាមួយស្មេីលើសង្វៀនប្រដាល់នៅឃុំតាគ្រាម ។
លុះនៅថ្ងៃកើតហេតុជនបង្កបានទូរស័ព្ទប្រាប់ឈ្មោះ ខួច ឱ្យជិះម៉ូតូឌុបដឹកឈ្មោះ ហេង ដារ៉ាវង្សមកជួបខ្លួនពេលមកដល់ចំណុចបឹងច្រមុះ ភូមិសំណាញ់ ឃុំភ្នំសំពៅ ជនបង្កដកដែករលាស់វាយទៅលេីឈ្មោះ ហេង ដារ៉ាវង្ស តែវាយមិនត្រូវដោយសារគេជួយឃាត់និងឈ្មោះហេង ដារ៉ាវង្ស គេចផុត រីឯស្នាមរបួសលេី ខ្លួនឈ្មោះ ហេង ដារ៉ាវង្ស រូបគេបានធ្វេីការបដិសេធថា វាយមិនត្រូវទេ។
ចំណែកវត្ថុតាងដកហូតរួមមាន៖ ដំបងដែករលាស់ប្រវែង ៥០ស.ម ចំនួន០១ដើម ។ បច្ចុប្បន្នជនសង្ស័យ ត្រូវបានបញ្ជូនមកអនុវត្តតាមផ្លូវច្បាប់៕ដោយ៖តារា
